Ich Vlreich der Stuchs von Prvnne vnd ich Wentel sein Hausurowe Wir vergehen vnd tv^en chvnt allen den, di disen brief lesent oder horent lesen, di nv lebent vnd hernach chu^enftich sind, daz wir mit aller vnser erben guten willen vnd gvnst, mit verdachtem mvt vnd mit gesampter hant, zu der zeit, do wir iz wol getvn mochten, Recht vnd redleich verchauft vnd geben haben vnsers rechten Chaufaigens vnsern Hof, der da leit ze Wu^elfleinstorf bei der Leyta, da fu^emf halbev Lehen in geho^erent vnd swaz dar zv geho^eret ze velde vnd ze dorf, ez sei gestift oder vngestift versu^echt oder vnuersu^echt, swie so daz genant ist, mit allem dem nvtz vnd recht, als wir In in aigens gewer her pracht haben, vmb fu^emf vnd saechtzich phvnt wienner phenninge, der wir recht vnd redleich gewert sein, Den erbern Gaestleichen Herren Pru^eder Wu^elfingen, zu den zeiten apt datz dem Heiligen Chreutz vnd der Samnunge gemain dez selben Chlosters vnd allen iren nachchomen fu^erbaz ledichleichen vnd vreileichen ze haben vnd allen irn frumen da mit ze schaffen, verchauffen, versetzen vnd geben, swem si wellen an allen irresal. Vnd darvber durch pezzer sicherhait so setzen wir vns, ich vorgenanter Vlreich der Stuchs von Prvnne vnd ich Wentel sein hausurowe vnd alle vnser erben vnuerschaidenleich vber den vorgesprochen hof ze Wulfleinstorf vnd vber alles daz, daz darzv geho^eret‚ alz vorverschriben ist, Den egenanten Gaestleichen Herren apt Wu^elfingen datz dem Heiligen Chrevtze vnd der Samnunge gemain dezselben Chlosters vnd allen irn nachcho^emen zu^e rechtem gewer vnd scherm fu^er alle ansprach, alz aigens reht ist vnd dez Landes recht ze O^esterreich. Waer aber, daz si mit recht an dem vorgenanten Hof vnd an alle dev vnd dar zu geho^eret, swie so daz genant ist, dehainen chrieg oder ansprach gewunnen von wem daz waer, waz si dez schaden nement, daz svln wir in alles auzrichten an allen irn schaden vnd suln auch si daz haben auf vns vnd auf allem vnserm gut, daz wir haben in dem Lande ze Osterreich, wir sein lebentich oder tode. Vnd daz diser Chauf furbaz also stet vnd vnzerbrochen beleibe, darvmb so geben wir in disen brief zu^e einem offen vrchunde vnd zu einem warn gezevge vnd zu^e einer ewigen vestnunge diser sache, versigilt mit vnserm Insigil vnd mit meiner vetern Insigiln, hern Hadmars vnd hern Merten der Pru^eder der Stuchsen von Trautmanstorf vnd mit meins Pru^eder Insigil, Marichartes des Stuchsen, die diser sache gezeuge sint mit irn Insigiln. Diser brief ist geben ze wienne nach Christes geburt Dreutzehen Hundert iar dar nach in dem fu^emf vnd Dreitzgisten iar, an dez Heiligen Chrevtzes Tage alz ez funden Ward.

Source Fulltext: WEIS, Heiligenkreuz (=FRA II/16, 1859) S. 165-166