ICH Herlieb der Vizlinger von Pa^eystorf Vnd ich Sophei sein Hausvrowe Wir veriehen vnd tun chunt allen den, die disen brif lesent oder herent lesen, die nv lebent vnd hernach chunftig sint, Daz wir mit vnser Erben gutem willen vnd gunst, mit gesampter hant, zv der zeit, do wir ez wol getvn mochten, Recht vnd redleichen verchauft haben vnsers rechten Lehens, daz wir ze lehen gehabt haben von dem Edeln herren Hern Jansen dem Tu^ersen von Rauheneke, der mir ez vnd meinen Erben ze ergetzung meiner dinst ze rechten Lehen verlihen hat, funf phunt vnd sechs vnd funftzig phenning wienner phening Gelts auf gestiftem gut behauster holden, Vnd der ligent ze Gensterndorf auf anderthalben lehen vnd auf zwain Hofsteten an vier phunt, Vnd ze Spannberch auf aim lehen zehen Schilling, Vnd auch mit alle dev vnd darzv geho^ert ze velde ze dorffe, Ez sei gepavt oder vngepavt, gestift vnd vngestift, versucht vnd vnuersucht, swie so daz genant ist. Daz vorgenant gut haben wir verchauft vnd geben mit allem dem Nutz vnd recht, als wir ez vnuersprochenleichen in rechter lehens gewer herbracht haben, vmb acht vnd virtzich phunt vnd vmb sechtzich phennig wienner Munsse, der wir gar vnd gentzleichen gewert sein, dem Erbern Geistleichen Herren bruder Wulfing zv den zeiten apt vnd dem Conuent gemain in dem Chloster datz dem Heiligen Chreutze; vnd auch dazselb Gut haben wir in aufgeben vnd bestet mit vnsers vorgenanten lehen heren hant, als lehens recht ist in Osterreich, fürbaz ledichleichen vnd vreileichen ze haben vnd allen iren frvmen do mit ze schaffen, verchauffen, versetzen vnd geben swem seu wellen, als in daz aller pest chome vnd fuegt an allen irresal. Wir sein auch vnuerschaidenleichen mit sampt vnsern Erben des vorgesprochen guts ir recht gewer und scherm fur alle ansprach, als lehens recht ist vnd des Landes recht in Osterreich. Vnd get in furbaz daran icht abe mit recht, daz schullen seu haben vnuerschaidenleichen auf vns vnd auf allem dem gut, daz wir haben in dem Lande ze Osterreich, wir sein lembtig oder Tode. Vnd daz diser Chauf furbaz also stet sei vnd vnuerwandelt beleibe, Darvber geben wir in disen brif zv Einem offen vrchunde vnd zv Einer steten Vestigung Versigelt mit vnserm insigel, Vnd mit hern Pravnn insigel des Weidner vnd mit hern Leupolts Insigel von Spanneberch, Die diser sache gezeug sint mit iren insigeln Vnd ander Erber leut genuch. Diser brif ist geben Nach Christes gepurt Dreutzehen Hundert iar Darnach in dem funf vnd Dreizzigisten iar, Des Nachsten Mentage vor Sande Michels Tag.

Source Fulltext: WEIS, Heiligenkreuz (=FRA II/16, 1859) S. 166-167