Ich Ott von Gottesprunne vergich offenleich an disem Prief vnd tvn chunt allen, die in lesent oder hörent lesen, die nv lebent vnd hernach chunftig sint, daz ich mit wol verdahtem mu^et, mit zeitigem rat meiner vreunt, mit guter gunst vnd willen meiner svn Nyclasse vnd Petreins vnd ovch mit einer gemainen verhengnusse aller meiner erben paidev vrowen vnd manne, ze der zeit, vnd ich ez mit reht wol moht getvn, verchouffet han meinen hof gelegen datz dem Winden pei dem See fu^er ein vreies lediges aygen mit allen den rehten vnd nutzzen, die dar zv gehorent ze veld vnd ze dorff, gestift vnd vngestift, versucht vnd vnuersucht, als ich in egenanter Ott vnd mein erben manich iar enther haben inne gehabt vnuersprochenleichen in gewer vnd in gewalt‚ den geistleichen Herren von dem Heligen Chreutz des pruder Seyfrid, ze den zeiten Hofmaister ze dem Chunigshof vnd ovch datz dem Newnaigen, weruer choufman ist gewesen vmb hundert phunt vnd vmb zwaintzig phunt phenninge wienner Mvnizz‚ der ich gar vnd gentzleichen gewert pin; also beschaidenleich‚ daz ich vorgenanter Ott vnd alle mein erben paidev vrowen vnd manne fürbaz nimmermer dehain ansproch, dehain wortung, nach chain zvuersiht sullen haben zv dem egenanten hof, nach zv allem dem, daz dar zv geho^eret, nvr daz die vorgenanten herren von dem heiligen Chreutz allen iren frumen da mit schullen schaffen, selber nutzzen vnd innehaben, versetzen oder verchouffen, wem sev wellent vreileichen an alle irrung. Ovch setzz ich mich egenanter Ott mit sampt meinen zwain vorgenanten svnen Nyclasen vnd Petrein zv einem rechten scherm vber den vorgenanten hof vnd vber allez, daz dar zv gehoret, gentzleichen fu^er alle ansprach nach des Landes reht in Vngarn. Vnd daz di red also stett vnd vnzebrochen beleib, darvber gib ich vorgenanter Ott disen prief zv einem offenn vrchund vnd zv einem woren gezevgen diser sache, versigelten mit meinem Insigel vnd ovch mit meines vorgenanten svnes Nyclass insigel vnd ovch mit meines pruder Jansen insigel, der ovch do mit diser sache ein vester gezeug ist. Der prief ist geben nach Christes geburd vber stetter drewtzehenhundert iar dar nach in dem ahtem vnd dreizzigistem iar, des Mitichens an dem aschtag. Der red sint ovch gezeugen Ortolf der Pluemstingel von Prukk, Nyclas der Veirer, Vlreich der Chröpphel, Chunrat der Cherntner, Levpolt der Hort, Dauid vnd Heinreich, ze den zeiten Richter datz dem Winden vnd ander erber leut genug, den die sache wolt chunt vnd gewizzen ist.

Source Fulltext: WEIS, Heiligenkreuz (=FRA II/16, 1859) S. 172