Capitulum Jauriensis ecclesie Omnibus christi fidelibus presentibus pariter et futuris presentes litteras inspecturis Salutem in eo, qui est omnium vera salus. Ad vniuersorum noticiam harum serie volumus peruenire, Quod Ottho filius Ortholphy de Sasun, Comitatus Musoniensis, pro se et pro Nicolao ac Petro, filiis suis ab una parte, frater Seueridus, magister Curiarum Monachorum ordinis Cysterciensis de nouo Predio domini Regis et iuxta Lacum Fertheu procurator Religiosorum virorum, videlicet, domini Abbatis et Conuentus Cenoby seu Monasterij sancte Crucis ordinis eiusdem de Austria pro eodem domino Abbate et Conuentu dicti Cenobij ac eodem Cenobio seu Monasterio ex altera, ad nostram personaliter accedendo presenciam Idem Ottho possessionariam porcionem suam seu Curiam titulo empcionis comparatam in possessione predicta Sasun existentem cum vtilitatibus suis, scilicet locis sessionalibus‚ Terris arabilibus, fenilibus, pratis et pascuis ac Jure Montano, nec non aliis Omnibus, in quibuscumque existant vel quocumque nomine censeantur, ipsam porcionem possessionariam seu Curiam contingentibus dedit, vendidit et tradidit predicto fratri Seuerido et per eum dicto domino abbati et Conuentui ac Cenobio siue Monasterio Sancte Crucis pro Centum et viginti Talentis latorum denariorum viennensium, plene et integraliter ab ipso receptis perpetuo, pacifice et irreuocabiliter tenendam, habendam et pariter possidendam, Nullo Jure, nulloque dominio in dicta possessionaria porcione seu Curia sibi et suis successoribus in posterum reseruato; Tali obligacionis vinculo mediante, quod, quicunque successiuorum temporum mutacione dictam porcionem possessionariam seu Curiam in toto uel in parte inpetere attemptauerint a dicto domino Abbate et Conuentu ac Monasterio sancte Crucis, uel quouis titulo aggrauare, ex tunc Ottho sepedictus et filii sui superius nominati ac eorum heredes ipsos expedire tenebuntur propriis laboribus et expensis, Proprietate nichillominus sepedicte porcionis possessionarie siue Curie apud dominum Abbatem, Conuentum ac Monasterium sancte Crucis semper remanente. In cuius rei memoriam et perpetuam firmitatem presentes concessimus litteras sigilli nostri autentici appensione roboratas. Datum feria quarta proxima post Octauas Pasce domini Anno eiusdem Millesimo Trecentesimo, Tricesimo Octauo. Magistris Moriccio preposito, Mathya lectore, Georgio cantore, et Petro custode, Ceterisque fratribus et dominis ecclesie nostre existentibus.

Source Fulltext: WEIS, Heiligenkreuz (=FRA II/16, 1859) S. 173-174