Ich Ott der Ruster vnd ich Jörg vnd ich Hartel sein brueder vnd ich Katrei vnd ich Gerdraut ir swester, wir veriehen vnd tu^en chunt allen den, di disen prief lesent oder horent lesen, di nu lebent oder hernach chunftig sint, daz wir mit woluerdachtem mu^et, nach vnser besten freunt rat, zu der zeit, do wir ez wol getu^en mochten, Recht vnd redleichen verchauft haben dem Erbern geistlichen manne, brueder Chunraten dem Chra^eg, zu den zeiten Hofmeister in dem Heiligenchreutzer Hof ze wienne, daz halb lehen, daz wir gehabt haben datz Hedresdorf ze rechten lehen von den erbern herren den mistelpeken, mit alle dev vnd datzu gehört ze velde, ze dorf, swi daz genant ist, davon man alle iar dient den Herren ze dem Heiligen chreutz ain halb phunt phenning an sande Michels tag ze rechten dienst. Daz haben wir dem Egenanten bru^eder Chunraten verchauft vnd geben vmb siben phunt wienner phenning, der wir iar vnd gentzleichen gewert sein, vnd wand auch der Egenant bru^eder Chvnrat daz selb halb Lehen gemaint vnd geben hat den herren in dem Siechauz daz dem Heiligen chreutz seiner sel vnd allen seinen vodern selen ze einem ewigen selgeret, dar vber so sein auch wir dezselben halben Lehens sein vnd seines Egenanten gotshaus recht gewer vnd scherm fu^er alle ansprach nach dez Landes recht in Osterreich. Vnd durch pesser sicherhait so setzen wir vns ich Ott der Schretenperger von chrut vnd ich Ott der Schretenperger, der Ottin aydem von pergarn, vnuerschaidenleichen mit sampt vnsern erben dem egenanten bru^eder chunraten vnd seinem gotshaus vber daz vorgesprochen halbe Lehen tze rechten geweren vnd scherm fu^er alle erben. Wer aber, daz in dar vber von dechainen erben darauf dehain chrig enstunde, den schulle wir in auzrichten an allen iren schaden vnd schullen si daz haben vnuerschaidenleichen auf vns vnd auf allem dem gu^et, daz wir haben in dem Lande ze Osterreich, wir sein lebentig oder tode. Daz diser chauf furbaz also stet sei darvber geben wir in ich Egenanter Ott der Rüster vnd wir beyde Otten di Schretenperger vnuerschaidenleichen fu^er vns vnd fu^er di andern erben alle wande, di nicht aygener insigel habent, disen brief versigelt mit vnsern Insigeln. Diser brief ist geben nach Christes geburde Dreutzehen hundert iar dar nach in dem acht vnd dreizzigisten iar an sand Pangretzen tag.

Source Fulltext: WEIS, Heiligenkreuz (=FRA II/16, 1859) S. 174-175