Ich Niclas der Tzurrendorfer vnd ich Haymel der Tzurrendorfer, desselben Niclas sun, wir verihen vnd tuen chunt offenleichen an diesem brief allen den, di in sehent, lesent oder horent lesen, daz wir mit Willen, mit wizzen vnd mit rat aller vnser erben den chrieg, der zwischen vns vnd den Gaystleichen heren, dem apt vnd der Samnung was von dem heiligen Chreutz vmb den Hof liezzen an vnsern genedigen hern Graf Paulen von Merteinsdorf; der beschied also, daz wir in solten iren alten brief wider geben vnd solten si vns zwaintzig phunt pheninge Wienner muntz geben, vnd solt furbaz aller chrieg ab seyn. Do richt wir sev ires briefs vnd si vns vnsers guetes. Darumb pint wir vns mit vnsern trewen zu gantzen Scherme, ich vorgenanter Niclas vnd ich Haymel die tzurrendorfer für vns vnd fur alle vnsere erben, vrawen vnd man, kegenburtiger vnd chumftiger fur alle ansprach. Also beschaidenleich, ob di egesprochen gaistleichen heren von dem heiligen Chreutz chainerhand chrieg angieng, des niht geschech, den sullen wir in auzrihten an alle ir mue‚ die weil vns allez daz were, daz wir in vngern haben oder wa wir ez haben. Daz geloben wir in bey vnsern trewen aynualtleichen vnd werleichen mit vrchund ditz briefs, der versigelt ist von erst mit vnsern baiden insigeln, darnach mit der edlen heren insigel, hern Albers von Puechayn vnd Graf Perchtrams vnsers genedigen hern vnd darnach mit der erbern leut insigel, Gotfrides des Greul vnd Graf Steffans von Sigendorf, zu den zeiten Purgraf auf Vorhtenstayn, di der sach gezeug sint mit irn insigeln vnd ander erber leut genueg, mit der hilf vnd mit der rat dise sach gewandelt vnd geendet ist. Der brief ist geben, do nach Christes geburd ergangen waren Dreutzehen hundert iar vnd darnach in dem Dreu vnd Virtzgistem iar an sand Michels tag.

Source Fulltext: WEIS, Heiligenkreuz (=FRA II/16, 1859) S. 186-187