Ich Ditrich von Ebental vnd Ich Margret sein Hausfrow vergich vnd tun chunt allen den, di disen prif sehent, lesent oder horent lesen, di nu lebent vnd her nach chunftig sint, das ich mit verdachtem mut vnd mit zitigem rat, vnd mit gutem willen aller meiner Erben vnd verhenchnuss meiner vreunt Gegeben han Den erbern Geistlichen Herren, Apt Leupolten vnd der Samnung Datz dem Heyligen Chreutz, vnd allen iren nachchomen Sechsvntvirtzich phenning geltes wienner müntz, Di da gelegen sint daz Veichestorf auf bestiftem vnd behaustem gu^et, Vm Ein halb phunt geltes winner phenning vberlentiges gutes, das da gelegen ist pei paden, Also beschaidenlich, Das di Ersamen Geistlichen Herren, Apt Leupold vnd di Samnung gemain schullen allen irn frumen schaffen mit dem vorgenanten sechsuntuirtzich phenning geltes ze verzetzen, verchauffen vnd gewen, sem si wellen an allen irisal. Ich pin auch der egenanten sechsuntuirtzich phenning geltes ir rechter gewer vnd scherm fu^er alle ansprach, als aygens recht ist vnd des Landes recht ist ze Osterrich. Vnd das di sache vnd die wandelung ewichlich stet vnd vnzeprochen beleib, darvber gib ich vorgenanter Ditrich von Ebental den ersamen Geistlichen Herren disen Priff zu einem waren gezeug vnd zu einem Ewigen vrchunt Versigelten mit meinem Insigel. Der da ist gegewen Nach Christes geburd Dreutzehen Hundert Iar Dar nach in dem Dre unt virtzichistem Iar an vnser urowen Tag, der do haist di Schidung.

Source Fulltext: WEIS, Heiligenkreuz (=FRA II/16, 1859) S. 186