Ich Andree Wolfhartes svn von Dorflein vnd mein Pruder Mychl vnd mein pruder Jans vnd mein pruder Heinreich vnd alle vnser erben, wir veriechen vnd tu^en chvnd offenlich an disem prief allen den, di in sehent oder horent lesen, di nv lebent oder hernach chvnftig sint, daz wir mit verdachtem mu^et vnd gu^etlichem willen vnserr Herschaft der Samnung von dem Heiligen Chrevtz haben genomen aus dem gu^et ze dorflein, do wir von dinen den egenanten vnsern geistlichen herren an acht zehen schilling phenning wienner mu^entz an sand Merteins tag, einen weingarten, der ee ein acher ist gewesen, in dem egenanten guet mit so ausgenomer red, daz der vorgnanter weingart vnd swer in innhat dienen schol Ocht phenning wienner muntz ze rechtem Purchrecht an sand Merteins tag vnsern vorgenanten herren von dem Heiligem Chrevtz. Wir mugen auch den vorgenanten Weyngarten verchauffen vnd versetzen vnd gewen, wem wir wellen, als Purchrechtes recht ist, vnd wenn man den weingarten verchauft, so schol der hin geit einen phennich gewen ze ableit, vnd der da chauft ainen phennich ze anlait. Vnd daz disev sache stet vnd vnzeprochen beleib, seit vu^er aygens insigels nicht hawen, so geben wir disen prief, ich vorgenanter Andree vnd Mychl vnd Jans vnd Heinreich mein pruder versigelten mit herrn Nyclass insigel, ze den zeiten pharrer ze Chvffarn vnd mit des erbern mans herrn Perchtoldes des perterleins insigel. Diser sache sint auch zevgen Chvnrat der weisse datz dorflein vnd Seyfrid der Maurrer, Ott der gruscher ze Chvffarn vnd ander biderb leut genug, den di sach vnd wandlung wol chvnd ist. Diser prief ist gegewen nach Christes gepurd vber drevtzehen hvndert iar darnach in dem drei vnd vi^ertzigestem Iar an dem Perichtag.

Source Fulltext: WEIS, Heiligenkreuz (=FRA II/16, 1859) S. 181-182