Ich Graf Paul von Merteinsdorf, ze den tzeiten dez mechtigen fürsten Ludweygs von Gotes genaden Chunigs von Vngern Gewaltiger Hof Richter, vergich offenwar an disem Prief allen Leuten gegenburtigen vnd Chunftigen, Daz ich durch gut vnd durch beschaiden Willen, vnd als iz vor mein mit auzgenomen tayding gewandelt ist tzwischen den erbern geistleihen hern Pruder Leupolten, ze den tzeiten Apt vnd der gemayn des Conuentes ze dem heyligen Chreutz gelegen in Osterich vnd Nyclasen dem Tzurrendorfer vnd seinem svn Haymlein vnd iern Erwen Paydenthalben mit iern guten gunst vnd willen vnd Verhengnusse di chriegig, tayding, di siv gegen einander gehabt habent, fürchtichleich vericht han vmb ein Hof gelegen in dem aygen ze Winden in Misenburger Grafschaft, also beschaiden, Daz di vorgenanten Heren von dem Heyligen Chreutz dem vorgesprochen Nyclasen dem tzvrrendorfer vnd seinen svn Haymlein vnd iern Erwen für den schaden, den siv von dem Hof genommen habent, Tzwayntzik phunt alter wienner phening geben vnd richten schullen vnvertzogen von sand Johans tag tze Svnnenwenten Darnach in Viertzehen ta^egen so beschaidenleich, datz der vorgenant Nyclas vnd sein svn Haymel vnd ier Erwen an dem vorgesprochen Hof vnd waz darzv geho^ert vnd vnvertzigen der tzwaier phunt geltes, di di heren von dem Heyligen Chreutz auf dem Hof habent, chain ansprach fürbaz haben schullen vnd paydenthalben beleiben an allen chrieg. Der sache diser Richtung Pin ich Graf Paul war Gezeug mit Vrchund ditz Priefs, besigelten mit meinen Insigel. Der Prief ist geben, do man von Christes gepurd tzalt Dreitzehen hvndert Iar, darnach in dem Drev vnd Viertzkisten iar, des Nechsten Svntages vor sand Johanns tag ze Sunnwenden.

Source Fulltext: WEIS, Heiligenkreuz (=FRA II/16, 1859) S. 185