Ich Weichart von Arenstain vnd ich Diemůt sein Hausfrowe, Wir veriehen vnd Tu^en chunt allen den, die disen brief lesent oder ho^erent lesen, Die nu lebent vnd hernach chumftich sint, Daz wir mit vnser Erben guten willen vnd gunst, mit verdachtem můt vnd mit gesampter hant vnd nach vnser pesten frewnt Rat, zu der zeit, do wir ez wol getun mochten, Verchauft haben vnsers rechten aygens, sechsthalben schillinge wienner phenninge geltes auf einem halben Lehen, daz gelegen ist ze Nechssinge, die man aller iar davon dient zwir im iar, zwen vnd achtzich phennige an sant Jorigen tage vnd drey vnd achtzich phenninge an sand Michels tage, Vnd da man auch von demselben halben Lehen den gaestleichen Herren datz dem Hailigen Chreutz alle iar dient funf vnd Sibentzich wienner phenninge, Die vorgenanten Sechsthalben Schillinge wienner phenninge geltes haben wir recht vnd redleich verchauft vnd geben mit alle dem nutz vnd recht, als wir si in aygens gewer her pracht haben, vmb funf phunt wienner phenninge, der wir gar vnd gentzleich gewert sein, Den erbern gaestleichen Herren Prüder Leupolten, zu den zeiten Appt vnd dem Conuent gemaine datz dem Hailigen Chreutz vnd allen irn nachomen fu^erbaz ledichleich vnd vreyleich ze haben vnd allen im frumen damit ze schaffen, verchauffen, versetzen vnd geben, swem si wellen an allen irresal. Vnd sein auch wir vnd vnser Erben vnuerschaidenleich der vorgenanten Sechsthalben Schillinge wienner phenninge geltes der egenanten gaestleichen Herren datz dem Hailigen Chreutz recht geweren vnd scherm fur alle ansprach, als aygens recht ist vnd des Landes recht ze O^esterreich. Waer aber, daz in mit recht an derselben gu^elt icht abgienge oder daz si icht chrieges oder ansprach daran gewunnen, swaz si des schaden nement, daz suln wir in alles auzrichten vnd widerchern an alle ir mu^e vnd an allen im schaden vnd suln si auch daz haben auf vns vnd auf allem vnserm gut, daz wir haben in dem Lande ze O^esterreich, wir sein lebentich oder tode. Vnd daz diser Chauf furbaz also staet vnd vntzebrochen beleibe, Darumb so geben wir in disen brief zu einem warn vrchunde vnd zu einer Ewigen vestnunge diser sache, versigelt mit vnserm Insigel vnd mit Otten Insigil von Arenstain, mein vorgenanten Weycharts o^ehaim, der diser Sache gezeuge ist mit seinem Insigil. Diser brief ist geben ze Wienne Nach Christes gebůrde Dreutzehen hundert Iar dar nach in dem fumf vnd Viertzigisten Iar, Des naehsten Dunnertage nach dem Oster Tage.

Source Fulltext: WEIS, Heiligenkreuz (=FRA II/16, 1859) S. 191-192