Ich Wernhart der Schower vnd ich Agnes sein Hausvrowe verichen vnd tun chunt an disem prief allen, dev in sechent, lesent oder horent lesen, di nv lebent vnd hernach chunftich sint, Daz wir mit vnser paider erben vnd ander vnser freunt rat vnd guete Wille, mit gesampter hand ze der zeit, do wir iz wol getuen machten, Verchauft haben den Geistleichen Herren, Prueder Leupolten, ze den zeiten Apt vnd dem Conuent gemain daz dem Heiligen Chreutz, Sechsthalben Schilling vnd vier phenning geltes wienner müns, der Neunzehen phenning liegent ze Haederstarf auf zwain hofsteten, die gelegen sint gegen Micheln dem Linser vber, vnd funf Schilling phenning, die do ligent auf siben Viertailn weingartens datz dem selben Haederstarf an der Hohen Leiten, vnd auf dreitzig Jeuchart archers, der Sechzehen Jeuchar ligent in dem zeileich, Vnd viertzehen Jeuchart in alten weingarten, Vmb zehen phunt phenning Wienner müns Vnd sechs Schilling phenning der vrowen ze leichauf, der wir gantz vnd gar verricht vnd gewert sein, vnd die selben gult hab wir in ze chauffen gegeben mit allem dem recht, vnd wir sev selben her haben pracht ze versetzen vnd verchauffen vnd geben wem si wellen. Vnd der vorgenannten Sechstalben Schilling vnd der vier phenning geltes, die gelegen sint ze dem egenanten Haederstarf auf den vorgenanten Hofsteten Vnd auf den egenanten Echern vnd weingarten, sein wir, ich vorgenanter Wernhart der Schower, vnd ich egenantev Agnes sein Hausvrow vnd vnser Erben der Erbern Geistleichen Herren Apt Leupoltes vnd des Conuentes datz dem Heiligen Chreutz vnd irr nachomen recht gewer vnd Scherm wider alle ansprach vnd chrieg, als des Landes recht ist ze Österreich. Vnd darvmb daz diser chauf vnd diser wandlung stet vnd vnzebrochen weleib, so geb wier in disen prief durch pezzer vrchunt diser sach, versigilten mit vnserm Insigel vnd mit des Erbern Herren Insigel, Hern Alberts von Rauchenstain, der diser wandlung gezeug ist mit seinem Insigel, vnd ander Erber leut genuech, den disev wandlung chunt vnd gewizzen ist. Diser prief ist geben nach Christes gepuerd vber Dreutzehen Hundert Iar, dar nach in dem Sechs vnd viertzgisten Iar, an sand Jacobs Tag in dem Hawersnit.

Source Fulltext: WEIS, Heiligenkreuz (=FRA II/16, 1859) S. 199-200