Ich Chunrat der Löher vergich offenleich an disem Prief, daz ich mit meinen erben vnd nachsten vreund gueten willen vnd gunst, ze der zeit, do ich iz wol getun mocht, verlubt vnd verpunden han gegen den erbern Gaistleichen herren Prueder Chunraten, ze den zeiten apt vnd dem Conuent gemain daz dem Heiligen Chreutz vnd gib in auch daz recht mit disem Prief, daz ich daz Wismat vnd di Aekcher, di da ligent ze Draeschirichen pei der Hurben, di ich gechauft han vnd davon dien zwelif phenning ze Purchrecht hinz dem Heiligen Chreutz vnd nicht mer, di vorgenanten Aekcher vnd Wismat sol nicht verchaufen dann Rittermaessigen Leuten oder Purgern vnd Pawern. Vnd gib in des ze vrchund disen Prief versigelten mit meinem Insigel. Der prief ist gegeben nach Christes geburd Dreuzehen hundert iar, dar nach in dem acht vnd vierzigisten Iar, an vnser vrowen tag zu der Liechtmesse.

Source Fulltext: WEIS, Heiligenkreuz (=FRA II/16, 1859) S. 204