Ich Michel von Mizzingendorf vnd ich Margret sein Hausvrow vnd vnser Erben, Wir vergehen vnd Tun chunt allen den, die disen brief lesent oder horent lesen, die nu Lebent vnd hernach chunftig sind, vmb daz phunt wienner phenning gelts rechts Purchrechts, daz die erbern gaestleichen herren gemain datz dem Heiligen Chraiwtz habent auf vnserm Hof gelegen ze Symaningen vnd auf den Syben phunden vnd dreizzig phennigen wienner münzze gelts gelegen auf einem akcher hinder dem aichpech des acht vnd dreizzig chrawtgaerten sint, vnd auf den viertzehen Schillingen vnd zwain phennigen wienner müntzze Geltes gelegen daselbens ze Symaningen auf zehen holden, daz alles in den vorgenanten vnsern Hof gehöret vnd auf alle dem, daz von alter darin gehöret, wie so das genant ist, Daz die vorgenanten erbern gaestleichen Herren gemain vnd alle ir nachchomen mit dem egenanten phunt gelts dez obgenanten vnsers Hofs vnd der Gült vnd güter, die dar zu gehorent, als si vorbenant sint, recht purchherren sint ze stiften, ze stören vnd sulln auch wir vnd vnser Erben oder wer denselben vnsern Hof vnd die güter die darzu gehorent, als vorgeschriben stet, nach vns inne hat vnd besitzet, In das vorgenant phunt geltes fürbas ewichleich alle iar davon dienen mit einander an sand Michels tag mit alle dem nutz vnd rechten, als man ander purchrecht in dem Lande ze Österreich dient vnd nicht mer, vnd welhs iares das ist, daz wir, oder wer die vorgenanten Güter nach vns inne hat vnd besitzet, den egenanten erbern gaestleichen Herren oder iren nachchomen daz obgenant phunt gelts nicht dienen vnd geben an sand Michels tag oder darnach in den naechsten vier wochen, so sol In danne zehant dez nachsten tags darnach an allez furbot, an chlag vnd an alles Gericht ledichleich dafür vervallen sein der egenant vnser Hof vnd darzu die egeschriben güter, die dar zu gehorent, allen irn frumen damit zeschaffen, verchauffen, versetzen vnd geben. wem si wellen an allen irresal. Vnd daz disew sache furbas also stet vnd vnzerbrochen beleib, Darvber so geben wir In disen brief zu einem waren vrchunde diser sache, versigilten mit vnserm Insigil, vnd mit herrn Chunrats Insigil dez Schenaicher, purger ze wienne, den wir dez gepeten haben, daz er diser sache gezeug ist mit seinem Insigil. Der brief ist geben nach Christes geburd drewtzehen Hundert iar darnach in dem sechtzgisten iar, an dem achten tag vor dem vaschang Tage.

Source Fulltext: WEIS, Heiligenkreuz (=FRA II/16, 1859) S. 252-253