Ich pruder Nyclaus zu den zeiten Kastner in dem Heyligen Creutzer hof ze wein (sic Wien) vergich offenlich an diesem brief, Daz für mich chom, do ich sazz an derselben meiner herren stat an Offem gericht, Der Erber Geystlich herr pru^eder Olreich von dem Heyligen Crutz vnd chlagt mit vorsprechen an dez Egenanten Gothaus stat auf Vlreich's hof von Mistelbach Gelegen ze Intzesdorf, zu nechst Jansen Pertleins hof an aynen tayl vnd an dem andern tayl ze nachst Orter grauenreder hof vmb siben schilling Wienner pfennig versezzens purchrechtz, vnd vm alle die zwispild, die mit recht darauf ertaylt seind, als ver, daz ich im mit recht poten darauf gab Offen hechel vnd peter Heneln die zwey vorsprechen. Die haben auch darvm gesagt mit irn trewen vor Rechten gericht, als sie zerecht solten, Daz sic den Egenanten hof mit sampt den umsezzen haben geschaut vnd geschatzt, daz er so tewer nicht enist, als daz versezzen purchrecht vnd zwispild, die mit recht darauf ertailt sind. Vnd wart gevragt, waz recht wer. Do geviel dem vorgenanten pru^eder V^olreichen do mit vrag vnd mit vrtail, er solt mir mein recht geben, daz hat er getan, Vnd scholt ich die vorgenanten Geystlichen herren datz dem Heyligen Creutz des vorgenanten hofs gewaltig machen vnd an die gewer setzzen. Daz han ich auch getan furbaz ledicleichen vnd vreileichen ze haben vnd allen im frumen damit ze schaffen, verchauffen, versetzzen vnd geben, swem si wellen an alle irsal. Vnd daz disew taiding vor mein vor offen gericht also ergangen vnd geschehen sein mit vrag vnd mit vrtail, vnd wann ich vnd die vorgenanten meine herren vns selber mit vnsern Insigel nichtz bestetten mu^egen, Darvber gib ich in disen prief zu aynen waren vrchund diser sach versigelt, mit der Erbern Leut insigel, perchtolds des Eybenthalers vnd herrn dietreichs dez Laubenbergers, die bei den Taydingen gewesen sint Vnd auch diser sach gezeug sint Mit irn Insigeln. Der prief ist geben ze Wienn Nach Cristes gepurd dreutzehen hundert Iar darnach in dem sechtzigisten Iar, des na^echsten Suntags vor vnser Vrawen tag, als si geporen wart.

Source Fulltext: WEIS, Heiligenkreuz (=FRA II/16, 1859) S. 254-255