Nos Lodouicus dei gracia Rex Hungarie memorie commendamus, quod‚ quia Frater Thomas Monachus claustri sancte Crucis dyocesis Patauiensis ordinis Cysterciensis in personis Religiosorum virorum fratrum Cholomani abbatis tociusque Conuentus Monasterii iam dicti nostrum adiens conspectum quasdam literas olim venerabilis in Christo patris domini Nicolai episcopi Jaurinensis predicti et autentico sigillo suo consignatas‚ inter cetera in se continentes‚ quod idem dominus Nicolaus Episcopus quondam fratri Herzo, Magistro Curie noui predii per abbatem et conuentum prefati Monasterii tunc constituto pro suis seruiciis sibi et dicte sue Jaurinensi ecclesie exhibitis, de gracia annuisset speciali, vt ipse et sui successores pro decimis terre Fogeldorf vocate prope ipsum nouum predium adiacentis, nil plus nisi duas Marcas argenti ponderis wiennensis singulis annis in festo sancti Georgii martyris eidem Episcopo, vel suis successoribus soluere tenerentur, nobis exhibuit et presentauit, nos predictorum abbatis et conuentus nominibus petens humili precum cum instancia, vt huiusmodi decimalem solucionem de predicta terra ecclesie Episcopo Jaurinensi modo premisso iuxta generosam videlicet domini Nicolai Episcopi annuenciam et commissionem faciendam approbantes ratam et gratam habere dignaremur; Ideo nos predictis literis Episcopalibus non abrasis, non cancellatis, nec in aliqua sui parte viciatis preuisis et diligenter examinatis, premissam peticionem eorumdem abbatis et conuentus condignam fore estimantes, memoratam solucionem decimalem per magistrum prefati noui predii per ipsos constitutum vel constituendum, pretextu dicte terre, Episcopo et ecclesie Jaurinensi modo prehibito singulis annis faciendam ratam et gratam habentes approbamus ita tamen, vt idem Magister seruicia eisdem, ecclesie scilicet et Episcopo Jaurinensi, racione premissorum debita facere et exhibere debeant ac teneantur omni cum effectu. Quam ob rem vobis decimatoribus sev prouisoribus decimarum dicte Jaurinensis ecclesie, nunc et pro tempore constitutis, firmissime precipimus et districte, quatenus Magistrum memorati predii per supradictos abbatem et conuentum eorumdemque successores constitutum vel constituendum ad ampliorem aut maiorem decimarum solucionem de dicta terra Fogeldorf vocata faciendam preter quam dictarum duarum Marcarum argenti ponderis supradicti conpellere nullatenus presumatis, sed accepta ab ipso singulis annis predicta taxacione prefatum Nicolaum Episcopum inposita et ordinata, reddatis ipsum Magistrum super expeditum de decimis prenotatis. Datum in Lipche in festo transfiguracionis domini, anno eiusdem M°. CCC°. Ix. primo.

Source Fulltext: WEIS, Heiligenkreuz (=FRA II/16, 1859) S. 262-263