Rudolfus Quartus Dei gratia Archidux Austrie, Styrie et Karinthie, Dominus Carniole, Marchie ac Portusnaonis, Comes de Habischsburg, Phirretis et Kyburch, Marchio Borgogie, nec non Lantgrauius Alsacie Omnibus in perpetuum. Si ad loca deo dicata benigne dirigimus aciem mentis nostre et eorum comodis intendimus diligenter non tantum eterne retribucionis merita, sed et laudis preconia consequimur temporalis. Vniuersis igitur presentibus quam futuris volumus esse notum, Nos priuilegium honorabilibus et Religiosis viris Cholomano Abbati et Conuentui Monasterii Sancte Crucis, Ordinis Cysterciensis, Pathauiensis dyocesis, a patre ac domino nostro Karissimo bone recordacionis traditum inseruisse presentibus ac innouasse per omnia in hunc modum. (Folgt die pag. 206, Nr. CCI abgedruckte Urkunde Herzog Albrechts II., ddo. Wien 1348.) Nos igitur Dux Rudolfus prefatus considerantes honestatem, vitam et laudabilem religionem Cholomani Abbatis et Conuentus predictorum ipsius ac monasterii intuitu retribucionis eterne, nec non pro remedio predecessorum nostrorum, quam salute quoque nostra et heredum nostrorum presentes innouacionis seu ratihabicionis literas dignum duximus concedendas. Nulli ergo omnino hominum liceat huiusmodi innouacionis nostre literas infringere, vel ei ausu temerario contraire; quod qui forsitan attemptare presumpserit, se grauem nostre indignacionis offensam et ad hoc centum libras auri nouerit incursurum, quarum quinquaginta libras nostre camere et quinquaginta libras hiis, qui aggrauati existunt, assignari debent et cedere pro emenda. Testes huius rei sunt Reuerendi in Christo patres et domini, dominus Ortolfus Archiepiscopus Saltzburgensis, Apostolici sedis Legatus, Paulus Frisingensis, Gothfridus Pathauiensis Episcopi, Johannes Episcopus Gurcensis, nostre camere Cancellarius, Fridericus Chimensis, Vlricus Seccouiensis et Petrus Lauentinus Episcopi. Illustris Princeps Meinhardus, Marchio Brandenburgensis, Superioris Bauarie Dux et Comes Tirolis, sororius noster karissimus‚ item nobiles viri auunculi nostri dilecti Albertus Palatinus comes Karinthie, Meinhardus comes Goricie, Bertholdus comes Meydeburgensis, Otto comes de Ortemburch, item fideles nostri dilecti Vlricus et Hermanus comites Cylie, Johannes comes de Phannberch, Lewtoldus de Stadek, Marschalcus prouincialis per Austriam, Johannes de Trawn, Capitaneus supra Anesum, Heinricus de Rappach, Magister curie nostre, Johannes de Lospach Magister camere, Wilhelmus Pincerna de Lybenberch dispensator panis nostre curie prefate, vna cum aliis pluribus fidedignis. Datum Wienne kalendis Aprilis anno domini Millesimo Trecentesimo sexagesimo secundo, etatis nostre xxiij° regiminis vero anno iiij°.

Source Fulltext: WEIS, Heiligenkreuz (=FRA II/16, 1859) S. 266-267