Ich Jans der dechendorfer, zu den zeiten purger ze Wienn vergich offenleich an diesem prief allen den, die in sehent, lesen oder hören lesen, die nu lebent Oder hernach chu^enftig sint, daz ich mit gutem willen aller meyner erben vnd mit gesampter hant zu der zeit, da ich ez wol getun mocht, Recht vnd redleich verchauft hab meynes rechten aygens achzehen phenning geltz wienner Mu^ens, die ich gehabt han auf ayner wisen, gelegen ze Minchendorf in den Twerhen wisen vnd haizzet deu Zannerin, der sechs Tagwerch sint vnd die zu den zeiten innhat vro Elsbet die pellendorferin, Geysel deu Ko^echin vnd Nychlaz der Karl, alle gesezzen ze Minchendorf, dem erbern Geystleichen herren, Abt Cholman vnd dem Conuent gemayn ze dem Heyligen Chra^eutz vm fu^enf schilling wienner phenning, der ich gar vnd Gentzleich gericht vnd gewert pin. Darvm pin ich den Egenanten herren ze heyligen Chra^eutz der obgenanten achtzehen phenning gelts ir rechter gwer vnd scherm fu^er alle ansprach nach dez Landes recht ze Österreich also beschaydenleich, daz die oftgenanten Herren ze dem Heyligen Chrautz allen irn frummen damit schaffen, verchauffen vnd ze versetzen vnd geben, swem sie wellen an allen irrsal. Vnd des ze aynem waren vrchu^end vnd gezeug gib ich in disen prief, versigelt mit meynem Insigel vnd mit des erbern mans Insigel herrn Chunratz des Scho^enayher, purger ze wienn, den ich des gepeten hab. Der Geben ist da man zalt von Christes gepurd Dreutzehenhundert iar darnach in dem zwayund sechzigisten iar, an sant Pangretzen Tag.

Source Fulltext: WEIS, Heiligenkreuz (=FRA II/16, 1859) S. 267-268