Ich Jans der velber vergich offenleich an dem prief, daz ich aller sach vnd ansprüch‚ die ich gehabt han hintz den erbern geystleichen herren von dem Heiligen Chreutz vmb den Hof vnd vmb der Mül zu Paden, die mein leibgeding gewesen scholt sein, mit guetem willen gegangen pin hinder den erbern man‚ hern Christann den Techenstainer vnd hinder Jansen in dem Winchel von Paden, waz de sprechen, daz wolt ich alles stet haben. De habent gesprochen, daz mir de herren von dem heyligen Chreutz scholten geben zehen phunt phenning wienner münzz, daz habent se getan, vnd scholt ich in iren guet ledig lazzen von aller ansprach vnd vodrung vnd scholt auch in ir pürgel ledig lazzen an all scheden; vnd daz gelub ich in alles stet pehalten vnd ze laisten pey mein trewn, vnd würden sew fürbaz indert geirret an irrvn guetern vmb de sach, daz schol ich in alles auzrichten vnd waz se des schaden nemen da, den schol ich in allen widercheren vnd daz schullen si haben auf mir vnd auf allem meinem gut, wo ich daz hab, ich sey lenbtig oder tod. Vnd zu einer pezzer sicherhait vnd waren zeugnuzve diser sach, so gib ich in dem prief versigelt mit meinem anhangunden insigel vnd mit dez erbern mans insigel hern Greiorigen dez Zînczendorfer vnd mit dez erbern mans insigel hern Cristan dez Techenstainer von Paden, die diser sach zeug sint mit irn anhangunden insigeln in an schaden. Der prief ist geben nach Criste gepürd Dreutzehen hundert iar darnach in dem neun vnd Sechtzgistem iar, dez virden Suntags nach Ostern.

Source Fulltext: WEIS, Heiligenkreuz (=FRA II/16, 1859) S. 288-289