Ich Wolfhart der Graf purger ze Wienn vnd ich Anna sein housurowe vnd alle vnser Erben, wir vergehen fu^er vns vnd fu^er alle vnser Nachkömen, die vnser Haws gelegen an dem alten Fleischmarcht ze Wienn nach vns innehabent vnd besitzent, vnd tun kunt offenleich mit dem brief, Das vns die erbern Geistleichen herren, prüder Cholman, zu den zeiten Abbt datz dem Heiligenchrewtz vnd der Conuent gemaine daselbens durch vnserr vnd anderr erbarr Lewt vleizziger pet willen von gnaden erlowbt habent, daz wir gewelbet haben in ir Mawr, die do gehört zu irm Haws‚ das do haizzet der Grashof, vnd darümb so vergehen wir, daz wir vnd alle vnser Erben vnd Nachkömen dasselb paw von dheinem rechten nicht haben, denn nvr von Gnaden. Vnd daz zu einem waren vrchunt geben wir den vorgenanten Geistleichen herren vnd allen irn Nachkomen den brief versigilten mit vnserm Insigil vnd mit hern Stephanns Insigil des Leytner, zu den zeiten dez Rats der Stat ze wienn, den wir dez gepeten haben, daz Er der sache gezewge ist mit seinem Insigil. Der brief ist geben ze Wienne nach Christes gepürd drewtzehen hundert iar darnach in dem vier vnd Sibentzgistem Iare, des nechsten Freytag nach sand Iarentzen Tag.

Source Fulltext: WEIS, Heiligenkreuz (=FRA II/16, 1859) S. 300-301