WIR Prvder Seyfrid Abbt vnd der Convent gemain datz Raytenhaslach veriehen vnd tvn chvnt allen den, di disen brief sehend oder horent lesen, di nv lebent oder hernach chvmftig sind, Daz wir mit gütleichem willen vnd gemainem Rat vnsers Conventes zv der zeit, do wir ez wol getun mochten, verchauffet haben vnsers rechten aigens gutes, Dreizzig phunt vnd ein halbes phvnt phenninge vnd zwen vnd zwaintzig phenning wienner mvnzze geltes grvntrechtez mit stiften vnd mit sto^eren gelegen, als hernach geschriben stent. Dez ersten ze Sarling von zwain Höfen, di do haizzent datz dem Haws vor der Stat ze ybs vnd von der widem doselbs, dienet Heinrich der amptman von seinem Hof zwen mvt chorn, fümf vnd sechtzig metzzen habern, fümf metzzen waitz, fümf metzzen gersten, Sechtzig phenning, vier chaes, vier hvnerr, ain gans, vnd hvndert ayer. Von dem andern Hof witig vnd Chvnrat auch zwen mv^et chorn, fv^emf vnd Sechtzig metzzen habern, fvmf metzzen waitz, fvmf metzzen gersten, Sechtzig phenning, vier chaes, vier hvnerr, ain gans, vnd Hvndert ayer. Johannes von der widem ze Sarling zwen mvtt chorn zwen mvt habern, vier hvner, vier chaes, vnd Hvndert ayer; das man alles dienet auf sand Giligen tag, vnd von den verig lehen datz dem Haws fvimftzig phenning auf sand Michels tag, vnd von vier Lehen ze Chrotental, Heinrich der Truesch von zwain lehen Viertzig metz-zen chorn, viertzzig metzzen habern, vier hvnerr, Sechtzig air, zwen haefen mit smaltz, iegleiches fvr sechs phenning, vnd zwaintzig phenning für malphenning. Von dem dritten Lehen, Symon der smoll zwaintzig metzzen chorn, zwaintzig metzzen habern, zwai hvnerr, dreizzig air, ain hefen smaltzes, für sechs pfenning, vnd zehen phenning für malphenning. Von dem vierden Lehen Heinrich der winter zwaintzig metzzen chorn, zwaintzig metzzen habern, zwai hvnerr, dreizzig air‚ ain hefen mit smaltz, für sechs phenning‚ vnd zehen phenning für malphenning; daz man auch alles dient auf sand Giligen tag. Von einer Hofstatt daselbs fvmfzehen phenning auf sand Michels tag. Dar nach ze Grub Heinreich vnd Chvnrat von ainem Hof drey schilling zehen phenning, zwai hvnnerr, viertzig ayer, ain hefen smaltz für sechs phenning, vnd zehen phenning für malphenning ze Heribsdorf, Chunrat von einem hof drey schilling zehen phening, zway hvnerr, dreizzig air, ain hefen smaltz für sechs phenning, vnd zehen phenninge für malphenning. Darnach ze Chvperch Chunrad von einem lehen fvmfthalben vnd sechtzig phenning, zway hvnerr, dreizzig air, ain höfen smaltz für sechs phenninge, vnd zehen phenninge für malphenning. Von dem andern Hof Stephan fvmfthalben vnd sechtzig phenning, zway hvnerr‚ dreizzig air, ain hefen smaltz für sechs phenninge, vnd zehen phenninge für malphenning. Vnd von den andern zwain hofen, Vlreich ein halbes phvnt phenning vnd nevn phenning, vier hvnerr, sechtzig ayer, zway hefen smaltzes, iegleiches für sechs phenning, zwaintzig phenning für malphenning. Datz sand Lienhart von akchern vnd vberlent. Tvemfoit von einem akcher drithalben vnd dreizzig phenning, Leubl am steg fvmftzehen pfenning, Seydel an der Hagmvl fvmftzehen phenning. Andre ob dem Fridreichsperich fvmftzehen pfenning, Chvnrad im dornaech dreizzig pfenning, der Pfarrer do selbs dritthalben vnd dreizzig pfenning, Chrumml der haffner dritthalben vnd zwaintzig pfenning, Fridreich eninchel dritthalben vnd dreizzig pfenning, Rvdel der sneider aindlef pfenning; Vnd datz Charlsteten, Niclos von einem lehen fvmf schilling zehen pfenning, zwai hvnerr, sibentzig air, vnd den pfenning dienst allen sampt schol man raichen vnd dienen an sand Michels tag; vnd zwo wisen ze Sarling datz dem haws pey ybs vnd di Chappelln ze Sarling, dar auf gelegen sint zehen schilling pfenning Purchrechttes zw einer mezz. Vnd von dem selben gült man haben schol vns selber vier hvner, viertzig air, vnd von dem akcher, der do haizzet Grunperch, vier chvffen saltzzes chlaines pandes, von einem garten da selbs drey chvffen saltzzes dez selben pantz. Die vorgenanten dreizzig pfvnt vnd ein halbes pfvnt vnd zwen vnd zwaintzig pfenning wienner mu^enzz geltes gruntrechtez auf den guetern, als si vorbenant sint, haben wir recht vnd redleich verchauffet vnd geben mit stiften vnd mit stören, mit allen den nuzzen vnd rechtten, als wir si an aygens gewer herpracht haben, vmb Drew Hvndert pfvnt Sechtzig pfvnt ein halb pfvnt vnd vier vnd zwaintzich wienner pfenning, der wir gar vnd gantzleich gewert sein, den Erbern gaistleichen herren Prvder Chollmann, zw den zeiten Abpt vnd dem Convent gemain dez chlosters datz dem Heiligen Chraewtz vnd allen iren nachchomen fürbas ledichleich vnd freileich ze haben vnd allen iren frvmen damit ze schaffen, verchavffen, versetzzen vnd geben, wem si wellent an allen irsal. Vnd auch wir egenanter brüder Seyfrid, abpt dez chlosters ze Raytenhaslach vnd der Convent gemain daselbs vnuerschaidenleichen der vorgenanten Dreizzig pfvnt vnd dez halben pfvnts vnd zwen vnd zwaintzig pfenning wienner mvnzz geltes den egenanten erbern gaistleichen herren gemain datz dem Heiligen Chräwtz vnd iren nachchomen recht geweren vnd scherm für alle ansprach, als aygens recht ist, vnd dez Landes recht ze Österreich. Wär aber, daz si mit recht an der egenanten gült icht chrieges oder ansprach gewunnen, waz si dez schaden nement, daz schullen wir in alles auzrichten vnd widercheren an allen irn schaden, Vnd schullen auch si daz haben auf vns vnuerscheidenleichen vnd auf allem vnserm guet, das wir haben in dem Lande ze Österreich, oder wo wir ez haben, wie so daz genant ist. Vnd daz diser chauff fürbaz also staet vnd vnzerbrochen beleib, Darvber so geben wir obgenant Prvder Seyfrid, zw den zeiten Abt vnd der Convent ze Raytenhaslach, den egenanten geistleichen herren gemain datz dem Heiligen chra^ewtz vnd iren nachchomen disen brief zw einem waren vrchunt vnd zw einer ewigen vestnung diser sach, versigilten mit vnsern baiden anhangunden Insigeln. Der brief ist geben ze Wienne nach Christes gepurd Drewtzehen Hundert Iar darnach in dem Vier vnd Sibentzigistem Iar, dez Erichtages vor sand Michels tag.

Source Fulltext: WEIS, Heiligenkreuz (=FRA II/16, 1859) S. 301-303