Lodouicus dei gracia Rex Vngarie, Polonie, Dalmacie etc. fidelibus suis vniuersis tributariis vbilibet in regno nostro constitutis Salutem et graciam. Cum nos . . abbati et monasterio sancte Crucis de austria de gracia speciali annuerimus, vt ipse quelibet victualia pro monasterio et fratribus suis necessaria, puta boues, vaccas, oues, vitulos, porcos, pullos, caseos, frumentum et alia quecumque victualia, cuiuscumque generis existant, et lanam de villis et Curiis eorum in regno nostro habitorum et existencium extraducere valeat atque possit sine tributi solucione pacifice et quiete, Mandamus igitur vestre fidelitati firmo Regio sub edicto omnino volentes, quatenus deinceps de premissis et eciam aliis quibuscumque victualibus, que prefato abbati de Sancta Cruce sub presencium confidencia in curribus aut equis de villis et Curiis suis ad Austriam deferuntur seu pelluntur, in locis tributorum vestrorum nullum tributum recipere seu exigere presumatis, sed permittatis huiusmodi victualia specifice nominata et alia quecumque, ut prefertur, eidem abbati deferre, quociens optimum fuerit et necesse, sine tributi solucione et absque inpedimento. Vobis vero speciose comittentes, quatenus fratres seu monachos dicti monasterii, dum in regno nostro procedunt, nulla racione in locis vestris tributariis inpedire audeatis, nec tributum recipere ab eisdem, Aliud non facturi. Datum in lipche in festo diuisionis apostolorum anno domini M°. CCC°. lxxiiii°. Presentes autem postquam reportate fuerint sub maiori sigillo nostro emanari faciemus. Datum ut supra (episcopus Vesprimensis Ladislaus). Et hoc idem tricesimatoribus nostris ipsiusque vice gerentibus iniungimus speciose faciendum. Datum ut ante.

Source Fulltext: WEIS, Heiligenkreuz (=FRA II/16, 1859) S. 299-300