Ich Marichart vom Ror vergich für mich vnd für alle mein erben vnd tun chunt offenleich mit dem brief allen den, di in lesent oder ho^erent lesen, die nv lebent vnd hernach chu^enftig sint, daz ich mit gu^etem willen, mit wolbedachtem müt, mit gunst aller meiner erben vnd nach rat meiner vrewnd, zu der zeit, do ich es wol getun mocht‚ recht vnd redleich verchaufft vnd gegeben han den erbern geistleichen herren pruder Cholman, zu den zeiten Abt datz dem heiligen Chraewtz vnd dem Conuent gemaine desselben Chlosters vnd allen irn Nachkomen meins rechten aygens, mein haws ze Nydern gadem vnd alle die aekcher, die dartzu gehorent, vnd viertzehen tagwerich wismats, vnd die vischwaid von dem Sparbach vntz an den Hannawer, vnd ein holtz, das do haizzet der Mu^elpertz, gelegen zenechst hern Albers des Ottenstainer holtz, vnd ein holtz in dem Marichpach, das do haizzet der Plutleinsgern, vnd stozzt an meiner swaiger Eberharts von Wildekke vnd seiner prüder holtz vnd an das Hannawer holtz vnd an der vorgenanten hern holtz vom heiligen Chraewtz, vnd ein holtz gelegen an dem Aenyger, haizzet der Hochchogel vnd stozzt ainhalben an hern Wolfgangs vonn Wynnden vnd hern Hannsen von Puchhaim holtz vnd anderhalb an vnsers Herren des Hertzogen holtz; vnd zehenthalb phunt Wienner phenning geltes, die auch zu dem egenanten haws gehorent, gelegen daselbens ze nydern gadem vnd ze Oberngadem vnd darvmb auf behaustem gut vnd auf überlent als hernach geschriben stet, und derselben gült leit auf behaustem gut acht phunt vnd zwen phenning geltes vnd auf vberlent aindlef schilling vnd sechs phenning geltes, vnd ist geraittet igleich ches, den man ze Weichnachten dient, für zwelif phenning, vnd igleicher ches, den man ze Ostern oder ze Phingsten dient, für acht phenning, igleich hu^en für vier phenning vnd ie zehen ayr für ainen phenning, vnd die zu den zeiten die hernachbenanten holden dienent. Von erst: ze Oberngadem in dem geraewt Dietel der Smydel zehen phenning an sand Michels tag, ainen ches ze weichnachten, ein vaschanghu^en, ze Ostern ainen ches vnd zehen ayr, an sand Jörgen tag zehen phenning, ze Phingsten ainen ches vnd zehen ayr, Nikel der Smydel zehen phenning an sand Michels tag, ainen ches ze Weichnachten, ein vaschanghun, ze Ostern ainen ches vnd zehen ayr, an sand Jorigen tag zehen phenning, ze Phingsten einen ches vnd zehen ayr. Seidel der Smydel zehen phenning an sand Michels tag, ainen ches ze Weichnachten, ein vaschanghun, ze Ostern einen ches vnd zehen ayr, an sand Jörgen tag zehen phenning, ze Phingsten ainen ches vnd zehen ayr. Derselb Seidel von einem holtz zehen phenning. Der Prantsteter fümftzehen phenning an sand Michels tag, ainen ches, ze Weichnachten, ein Vaschanghun, ze Ostern einen ches vnd zehen ayr, an sand Jörigen tag fümftzehen phenning, ze Phingsten einen ches vnd zehen ayr, alles auf behawstem gut. Vnd von der Padstuben daselbens ze oberngadem ze Weichnachten, ze Ostern vnd ze Phingsten zu yeder hochzeit zwen vnd dreizzig phenning. Darnach ze nyderngadem ouf behawstem gut die Paewrinn fümf vnd zwaintzig phenning an sand Michels tag, ainen ches ze Weichnachten, ein vaschanghun, ze Ostern einen ches vnd zehen ayr, an sand Jorigen tag fümf vnd zwaintzig phenning, ze Phingsten einen ches vnd zehen ayr. Vllrich der Pinter fümftzehen phenning an sand Michels tag, ze Weichnachten einen ches, ain vaschanghun, ze Ostern ainen ches vnd zehen ayr, an sand Jörigen tag fünftzehen phenning, ze Phingsten ainen ches vnd zehen ayr, Hainreich der Wollslaher zwaintzig phenning an sand Michels tag, ze Weichnachten ainen ches, ain vaschanghun, ze Ostern ainen ches vnd zehen air, an sand Jörigen tag zwaintzig phenning, ze Phingsten ainen ches vnd zehen ayr. Andre der Weintzürl ne^ewn vnd zwaintzig phenning an sand Michels tag, ze Weichnachten einen ches, ain vaschanghun, ze Ostern ainen ches vnd zehen air, an sand Jorigen tag newn vnd zwaintzig phenning, ze Phingsten einen ches vnd zehen ayr. Andre der Megerl dreizzig phenning an sand Michels tag, ze weichnachten zwen ches, ain vaschanghun, ze Ostern zwen ches vnd zwaintzig air, an sand Jörigen tag dreizzig phenning, ze phingsten zwen ches vnd zwaintzig ayr. Peter der Phaeffel fümf phenning an sand Michels tag, ein vaschanghun, an sand Jörigen tag fümf phenning. Die fridlin Pawrin fümftzehen phenning an sand Michels tag, ze weichnachten ainen ches vnd zehen air, ein vaschanghun, ze Ostern einen ches an sand Jörigen fümftzehen phenning, ze Phingsten ainen ches vnd zehen air. Andre an der Wydem sechs phenning an sand Michels tag vnd sechs phenning an sand Jörigen tag. Die Römerin sechs phenning an sand Michels tag, ze weichnachten einen ches, ain vaschanghun, ze Ostern einen ches, an sand Jörigen tag sechs phenning, ze Phingsten ainen ches. Dietel der Kerner sechs phenning an sant Michels tag, ze Weichnachten einen ches, ein vaschanghun, ze Ostern einen ches, an sand Jörigen tag sechs phenning, ze Phingsten ainen ches. Chunrat der Fleischerer sechs phenning an sand Michels tag, ze weichnachten ainen ches, ain vaschanghun, ze Ostern einen ches, an sant Jorigen tag sechs phenning, ze Phingsten einen ches. Andres Aydam sechs phenning an sand Michels tag, ze Weichnachten ainen ches, ain vaschanghun, ze Ostern einen ches, an sand Jörigen tag sechs phenning, ze Phingsten einen ches. Rüdel Swentter sechs phenning an sant Michels tag, ze weichnachten ainen ches, ein vaschanghun, ze Ostern einen ches, an sand Jörigen tag sechs phenning, ze Phingsten ainen ches. Vllrich der Greymel newn phenning an sant Michels tag, ze Weichnachten einen ches, ain vaschanghun, ze Ostern einen ches vnd zehen air, an sand Jörigen tag newn phenning, ze Phingsten ainen ches vnd zehen air. Jans Hagen fümfzehen phenning an sand Michels tag, ze weichnachten ainen ches, ain vaschanghun, ze Ostern ainen ches vnd zehen ayr, an sand Jörigen tag fümftzehen phenning, ze Phingsten ainen ches vnd zehen air. Jans der Stellner fümf vnd zwaintzig phenning an sant Michels tag, ze weichnachten ainen ches, ein vaschanghu^en, ze Ostern ainen ches vnd zehen air, an sand Jorigen tag fümf vnd zwaintzig phenning, ze Phingsten ainen ches vnd zehen ayr. Nikel der Schrat fümf vnd viertzig phenning an sand Michels tag, ze Weichnachten ein ches, ain vaschanghun, ze Ostern einen ches vnd zehen air, an sand Jörigen tag fümf vnd viertzig phenning, ze Phingsten ainen ches vnd zehen air. Die Pechlin fümftzehen phenning an sand Michels tag, ze Weichnachten ainen ches, ein vaschanghun, ze Ostern einen ches vnd zehen air, an sand Jörigen tag fümftzehen phenninge, ze Phingsten ainen ches vnd zehen air. Der Jaeger sechs vnd viertzig phenning an sand Michels tag, ze weichnachten einen ches, ain vaschanghun, ze Ostern ainen ches vnd zehen air, an sand Jörigen tag sechs vnd viertzig phenning, ze Phingsten ainen ches vnd zehen air. Jans der Zimerman fu^emfzehen phenning an sand Michelstag, ze weichnachten einen halben ches, ein halbes vaschanghun, ze Ostern einen halben ches vnd fümf air, an sand Jörigen tag fümftzehen phenninge, ze Phingsten einen halben ches vnd fümf air. Vlreich der Kerner sibentzehen phenning an sand Michels tag, ze Weichnachten einen halben ches, ein halbes vaschanghun, ze Ostern einen halben ches vnd fümf air, an sand Jörigen tag sibentzehen phenning, ze Phingsten einen halben ches vnd fümf ayr. Peter der Churtz sechs phenning an sand Michels tag, ze weichnachten ainen ches, ein vaschanghun, ze Ostern einen ches vnd zehen air, an sand Jörigen tag sechs phenning, ze phingsten ainen ches vnd zehen air. Dietel der Waes sechtzig phenning an sant Michels tag, ze weichnachten zwen ches, zwai vaschanghuner, ze Ostern zwen ches vnd zwaintzig air, an sand Jörigen tag sechtzig phenning, ze phingsten zwen ches vnd zwaintzig air. Darnach von vberlent der Plaseinweil von einem akcher in dem geraw^et, drew herbsthuner. Jans im Winkchel von einem akcher in dem Gerawt drew herbsthu^ener. Chu^enrat pei der chirichen von einem akcher in dem gerawt zwai herbsthu^ener vnd von chrawtgarten viertzehen phenning. Nicla Traeppel von einem akcher in dem gerawt ain herbsthun. Die alt Pawrinn von chrautgerten dreitzehen phenning vnd von einem akcher zwen phenning. Vllrich der Pinter sechs phenning von chrawtgerten hinder dem stadel. Andre der Weinzürl von dem Raewtakcher drew herbsthu^ener vnd von einem andern akcher acht phenning an sand Michels tag vnd acht phenning an sant Jörigen tag. Die Fridlinn Paw^erinn zwen phenning von einem akcher, Andre an der Wydem acht phenning von einem akcher, Chunrat Fleischerer vier phenning von chrautgerten. Rudel der Swentter fu^emftzehen phenning von aekchern. Jans Hagen von des Kerner akcher newn phenning an sand Michels tag Vnd von zwain wisen vnd von einem chrawtgarten vnd von einer wies sechs phenning. Nikel der Schrat von einem akcher, der genant ist, der Chregel, sechs phenning an sand Michels tag. Lewbel der nydrolt von einem akcher sechs phenning an sand Michels tag vnd von einem chrawtgarten vier phenning. Lewpolt Chogler acht phenning von chrawtgerten vnd sechs phenning von einem akcher. Der Nebel acht phenning von chrawtgerten. Der Jaeger von einem halben akcher zwen phenning. Dietel der Wais von einem akcher ain herbsthu^en. Hainreich der Chogel von einem akcher zwen phenning. Der Chint peter von zwain akchern sechtzehen phenning. Die Pechlinn von einem Krawtakcher acht phenning. Der Kerner von chrawtgerten acht phenning. Andre der Chuebekch von chrawtgerten sechs phenning. Darnach von einem akcher sechs phenning, aber von einem akcher vier phenning vnd von einem chrawtgarten ain hun vnd von dem Herolsrawt sechs phenning, vnd von der pewnt zway huner, vnd von einem akcher daselbens zwai huner, vnd von einem wisflekch hinder dem haws drei phenning, vnd von einem chrawtgarten ze niderngaden zwai herbsthüner vnd von einem chrawtgarten acht phenning an sand Michels tag vnd acht phenning an sand Jörigen tag. Vnd dreizzig phenning geltes, die die Gemayn ze Phafsteten dient von der wayd, genant, die Raber leyten, vnd daz gantz dorfgericht ze nyderngadem an swas an den tod get, vnd alles das, das ich daselbens vnd in dem Tal darumb gehabt han in vrbar, ze holtz, ze veld vnd ze dorff, es sei gestifft oder vngestifft, versucht oder vnuersucht, wie so das genant ist, daz alles rechtes aygen ist, denn nur daz vorgenant holtz an dem Anigern, genant der Hochchogel, das ist Lehen gnedigen genedigen herren den hertzogen ze Österreich. Es hat ouch das vorgenant haws das recht, daz es alltag einen gevnden wagen gehaben mag aus den obgenanten höltzern, die darzu gehörent an alle irrung. Dasselb haws ze nydern gadem vnd alles das, das darzu gehoret, vnd alles das, das ich daselbens vnd in dem Tal darumb gehabt han, als es vor an dem brief benant vnd verschriben ist, nichts ausgenomen, han ich den obgenanten erbern geistleichen herren, dem Abt vnd dem Conuent gemain datz dem Heiligen Chraewtz vnd allen irn nachkomen recht vnd redleich ze chawffen gegeben mit allen dem nwtzen‚ ern vnd rechten‚ als ich es alles in aygens gewer vnd nvr das ain holtz an dem aeniger in lehens gewer herpracht han, vmb drewhundert phunt vnd vmb siebentzig phunt wienner phenning‚ der sie mich gantz vnd gar verrichtet vnd gewert habent, also daz si dieselben guter mit allen den nvtzen, ern vnd rechten, die dartzu gehörent, als dauor benant vnd begriffen ist, sülln fürbas ledichleich vnd vreileich haben, besitzen, niezzen vnd nvtzen, vnd mu^egen auch damit allen irn frumen schaffen, verchowffen, versetzen vnd geben, wem si wellen vnd alles das damit tun und handeln, das in allerpest füegt oder geuellet an allen chrieg vnd an allen irrsal. Vnd sein ouch wir, ich obgenanter Marichart vom Ror vnd alle mein erben des vorgenanten hawses ze Niderngadem vnd alles des, das dartzu gehöret, vnd alles dez, das wir daselbens vnd in dem Tal darvmb gehabt haben, als vor an dem brief benant vnd verschriben ist, der egenanten geistleichen herren gemayn datz dem heiligen Chraewtz vnd aller irer nachkomen recht gewern vnd scherm für alle ansprach, als aygens recht ist vnd des landes recht ze Österreich, vnd besunderleich des holtzes an dem Aenyger, als lehens recht ist vnd des Lanndes recht ze Österreich. Wer aber, daz si an dem oftgenanten haws oder an den vorgeschriben gutern vnd zugehörungen, die wir in dartzu gegeben haben, icht chrieges oder ansprach gewunnen, von wem das wer, mit recht, oder ob in daran icht abgieng mit recht, swas si des schaden nement, das sullen ich, oder ob ich nicht wer, darnach mein nechsten erben in alles ausrichten vnd widerchern an allen irn schaden, vnd sulln auch si das haben auf vns vnd auf allem vnserm gu^et, das wir haben in dem Lande ze Österreich, oder wo wir es haben, wie das genant ist, wir sein lebentig oder tod. Vnd daz der chauf fürbas also stet vnd vntzerbrochen beleibe, darüber so gib ich egenanter Marichart vom Ror für mich vnd für alle mein erben den oftgenanten geistleichen herren gemayn datz dem heiligen Chraewtz vnd allen irn nachkomen den brief zu ainen warn vrchu^end vnd ze einer ewigen vestnung der sache versigelten mit meinem angehangenn insigil vnd mit meins vetern insigil, Hannsen von Guenfarn vnd mit meiner Swaeger insigiln, des vorgenanten Eberhartes von Wildekk vnd Thomans von Wildekk seins pru^eders vnd mit meins Swagers insigil Christans des Taehenstainer, die des vleizzichlich gepeten han, daz si des chauffs vnd der vorgeschriben hanndlung vnd sache getzewgen sint mit irn angehangenn insigiln. Der brief ist geben ze Wienn nach Christes gepu^ert drewtzehenhundert Iar darnach in dem sechs vnd sybentzgistem Iar, an sant Jörigen tag des heiligen Martrer.

Source Fulltext: WEIS, Heiligenkreuz (=FRA II/16, 1859) S. 308-313