Ich Christian von Wetzeldorf vergich für mich vnd für alle mein erben Vnd tun chunt allen leuten offenbar an dem brief, Das ich mit gueten willen mit verdachtem mut, nach meiner freint Rat mich gentzleich fürzicht getan han vnd fürtzeich auch mit dem brief Des gantzen Hoffs ze Wetzeldorff, vnd des vier gantzer lehen sind, zwai meins Rechten aygens vnd sind gelegen daselbs nest Weychard dem pehaym, vnd zwai sind ze lehen von dem erbern Hern Hern Cholman, die zeit Probst des Gothaus vnser vrowen ze Neunburch Chloster halben, gelegen auch daselbs znest Christan dem Vogelsang, vnd swas darzu gehort ze veld vnd ze dorff, Es sei gestifft oder vngestifft, versuecht oder vnuersuecht, wie so das genant ist vnd swie so das alles gelegen ist. Hintz meinem svn Dyettreichen von Wetzeldorff also, das ich egenanter Christan fürbas hintz demselben gantzen Hoff, des vier gantze Lehen sind, als vorumschriben stät, vnd swas darzv gehort, noch hintz meinem egenanten svn Dyetreichen, noch hintz seinen erben von desselben Hoffs wegen weder mit brieffen noch an brieff chain ansprach, chrieg, Recht, wartung noch vordrung nimmer haben noch gewinnen sullen weder vil noch wenikch. In der beschaiden, das der egenante Dyetrich mein svn mit demselben gantzen Hoff vnd was dar zu gehort, als vorbenant ist, sol fürbas allen seinen frumen schaffen, mit verchauffen, mit versetzen vnd schaffen, machen, geben, swem er welle an alln irsal, so im das alles pezer fu^eegend ist. Vnd das die sach vnd die wandlung also fürbas stet gantz vnd vnzebrochen beleib, Darvber so gib ich im obgenannten Christan vonn Wetzeldorff den brief ze einem sichtigen waren offen vrchund der sach, versigelten mit meinem aygen anhangunden insigil vnd darzue ze pezzer sicherhait ze han ich vleiz gepeten Seyfriden den porawe^er ze Nodendorf, das er der sach zeug ist mit seinem insigil im an schaden. Der brief ist geben nach christi gepurd Drewtzehen Hundert Iar vnd in dem sechs vnd Sybintzigisten Iar darnach, des Sampztags vor Judica in der vasten.

Source Fulltext: WEIS, Heiligenkreuz (=FRA II/16, 1859) S. 307-308