Ich Agnes di Chlammerinn, hern Hansen des Sunberger seligen witib vnd alle mein erben veriehen offenlich an diesem brif, Daz ich von meinem hof, den ich gechawfft han von der Pütrinn vnd ist gelegen ze Gumdramstorf in dem winckel, alle iar raichen vnd geben sol den erbern geystlichen Herrn apt Cholmann vnd dem Conuent gemain datz dem heyligen Chräwtz ze einem rechten purchrecht an sand Michels tag siben schilling wienner phenning vnd verpint awch mich vnd mein erben, alle vodrung douon ze geben, als ein anderr tut von als vil purchrecht. Vnd wann ich in den dienst ze rechter Zeit, als vor geschriben stet, nicht geb, So süllen se awf dem egenanten hof darumb phennten, als purchrechts recht ist an alle wider red. Vnd wann ich vorgenante Agnes die Chlammerinn nicht aygens Insigel ab, Darumb ze einem vrchund vnd ze einer bestetigung diser sach gib ich in disen brif versigelt mit meines prüder, hern Hainreichs des Chlammer Insigel, vnd mit meines Öhem, hern weycharts des Arnstainer ze Gundramstorf Insigel. Der brif geben nach Christes gepürd Drewzehen hvndert iar darnach in dem Siben vnd Sibentzgisten iar des Svnntages ze mitterr vasten.

Source Fulltext: WEIS, Heiligenkreuz (=FRA II/16, 1859) S. 316-317