Ich Yrnfrid der Poerl vnd mein Erben Veriehen offenlich mit dem Prieff allen den, di in Lesent oder ho^erent lesen, daz ich von meinem Hoff gelegen zu arbaistal schol dienen alle Iar auf sand Michelstag zu rechtem Purchrecht dem Apbt vnd dem Conuent des chlosters zu dem Pelis in vngern, oder wer vns monet mit dem prieff, ain pfunt wienner pfenning gelts, daz In gegeben ist von den herrn von Stadekk zu ainem Ewigen sel geraet. Tet ich des nicht, so schol sich der vorgenant Abpt vnd der Conuent, oder wer an irn stat ist, meines vorgenanten hoff mit meinem gu^etlichen willen vnderwinden an fu^erbot vnd chlag vnd dar auff pfenden, als auff anderm purchrecht recht im dem Land ze o^esterrich. Vnd zu vrkund diser sach gib ich vnd mein Erben den Prieff versigelten mit meinem Insigel vnd mit Herrn Jo^erigen des Dern meines Ohem. Der Prieff ist gegeben nach Christi gepurd in Drewzehen Hundert Iar vnd dar nach in dem siben vnd sibentzisten Iar‚ des vreytags vor Sand Agnesen tag.

Source Fulltext: WEIS, Heiligenkreuz (=FRA II/16, 1859) S. 315