Albertus dei et apostolice sedis gracia Episcopus Patauiensis. Ad noticiam presencium et memoriam futurorum. Litteras reuerendissimi in christo patris et domini domini Gvidonis, miseracione diuina titulo sancte Cecilie Presbiteri Cardinalis eius vero sigillo impedenti, ut prima apparebat facie, sigillatas, sanas et integras omnique prorsus vicio et suspicione carentes nobis pro parte venerabilis et religiosorum virorum in christo nobis dilectorum . . Abbatis et conuentus Monasterii Sancte Crucis ordinis Cysterciensis, nostre Patauiensis diocesis presentatas ea qua decuit reuerencia recepimus per omnia in hec verba. (Folgt die S. 210, Nr. CCIV abgedruckte Urkunde des Cardinal-Legaten Guido ddo. 1350, 30. Juni.)||
Post quarum quidem litterarum presentacionem et receptionem fuimus pro parte dictorum Abbatis et Conuentus debita cum instancia requisiti, quatenus commissionem per easdem litteras nobis factam exequi curaremus. Nos igitur volentes iuxta commissionem eandem procedere, vt tenemur, de contentis in predictis litteris inquisiuimus diligenter, et quia contenta in ipsis preuia inquisicione debita inuennimus veritate fulciri, nobisque ob supradicti Monasterii hospitalitatem excessiuam, ac alia sibi incumbencia onera oportunum videbatur et expediens, quod subscripta vnio et incorporacio suum debitum sortirentur effectum. Idcirco parochialem ecclesiam Sancti Georgii in Oleth prefate nostre diocesis ad dictorum Abbatis et Conuentus presentacionem alias spectantem cum omnibus iuribus et pertinenciis suis eisdem Abbati et Conuentui et per ipsos dicto eorum Monasterio auctoritate nobis in hac parte tradita vnimus et incorporamus ac in perpetuum annectimus per presentes, Ita quod cedente vel decedente rectore ipsius ecclesie sancti Georgii, qui nunc est, vel eciam eadem quotiescumque alio modo vacante liceat eis et successoribus suis, qui pro tempore fuerint, memoratam ecclesiam Sancti Georgii cum omnibus iuribus et pertinenciis suis et corporalem possessionem ipsius ingredi ac eciam libere apprehendere et tenere, ipsiusque fructus, redditus et prouentus in proprios vsus conuertere, consensu alterius cuiuscumque minime requisito. Prouiso, quod memorata ecclesia S. Georgii debitis exinde non fraudetur obsequiis, sed faciant ibidem, prout oportunum extiterit, et est uel fieri consuetum iuxta dictarum litterarum continenciam deseruiri laudabiliter in diuinis; Juribus eciam papalibus, metropoliticis et nostris ac successorum nostrorum Patauiensium Episcoporum, qui pro tempore fuerint, ac institucione canonica ad dictam ecclesiam sancti Georgii, quocies ipsam vacare contigerit, facienda. Quamquidem institucionem canonicam nobis et eisdem successoribus nostris reseruamus in perpetuum semper saluis. In quorum omnium et singulorum euidens testimonium et certitudinem pleniorem presentes litteras fieri ac sigilli nostri appensione fecimus roborari. Datum Wienne supradicte nostre diocesis die xvij. Mensis Martii, Anno domini Millesimo Trecentesimo octuagesimo.

Source Fulltext: WEIS, Heiligenkreuz (=FRA II/16, 1859) S. 343-344