Ich Ott der Pleitinger vnd alle mein erben verihen offenlich mit dem brif, daz ich von meinem hof, den ich gechoufft han von Jansen dem Strobel vnd ist gelegen ze Phafsteten vnd ist weilen gewesen Chünrats von Schintha, von dem selben hof sol ich alle iar raichen vnd geben den erbern geistlichen herren, Abt Cholmann vnd dem Conuent datz dem Heiligenchräwtz in ir Siechampt ze einem rechten Purchrecht an sand Michels tag ain phunt wienner phenning vnuerzogenlich, vnd verpind ouch mich vnd mein erben alle vodrung douon ze geben, als ain anderr tut von als vil purchrechts. Vnd wann ich in den dienst, der von demselben hof geuallen sol, ze rechter zeit, als vor geschriben stet, nicht geb, so sullen se ouf dem egenanten Hof darumb phennden, als vmb versezzens purchrecht recht ist in dem Lannd ze Österreich an alle widerred; vnd wann ich den egenanten hof verchouffen wil, daz sol ich des ersten den vorgenanten geistlichen herren ze wizzen tun oder irn anwalt vnd sol dann der chouff mit irn willen vnd gunst geschehen. Vnd wann ich obgenanter Ott der Plyitinger nicht aegens Insigel hab‚ Darüber ze einem vrchund der sach gib ich den vorgenanten geistlichen herren Abt Cholmann vnd dem Conuent gemain datz dem Heiligenchräwtz den brif versigelt mit der erwürdigen vnd beschaiden mann Insigel, hern Stephanns des Pleitinger vnd Michels des Cholben, die zeit Judenrichter datz Medlik, die der sach gezewg sind in an schaden. Der brif ist geben nach Christes gepurd Drewzehen hundert iar darnach in dem achtzisten iar, des nasten Eritages vor vnser vrowen tag ze der Liechtmesse.

Source Fulltext: WEIS, Heiligenkreuz (=FRA II/16, 1859) S. 335