Ich Piligreym der Straiffing zu Sand Marein vnder dem Leyttaperig vnd ich Elzpet sein hausfrow, vnd ich Dyetmar der Straiffing zu Trautmansdorff, dez vorgenanten her Piligreims prueder vnd ich Agnes sein hausfrow vnd alle vnser erben wir vergehen vnd tun kunt an dem prief allen Lewten gegenwürtigen vnd chünftigen, di den brief sehent, lesent oder horent lesen, Daz wir mit woluerdachtem muet vnd mit gesampter hant vnd mit willen vnd gunst aller vnser Erben zu der zeit, do wir ez wol getun mochten, Recht vnd redleich ze chouffen geben haben dem Erbern geistleichen herren hern Cholmann, zu den zeiten Abt zu dem Heiligen Chrewtz vnd der gemain, des Conuents doselbs zu dem Heiligen Chrewtz vnsers rechten aygen Guts ain halbs phunt wienner phenning gelts, gelegen in Prukk an der Leytta auf einem Stadel, der do levt in der obgenanten geistleichen herren Haws; dazselb obgnant halb phunt wienner phenning sew vns alle iar gedint habent von dem obgnanten Stadel zu Purchrecht; vnd daz obgnant halb phvnt wienner phenning gelts haben wir In ze chouffen geben vmb achthalb phunt wienner phenning, der sew vns gantz vnd gar verricht vnd gewert habent, also mit ausgnomer red, daz der obgnant herr Cholman abt zu dem Heiligen chrewtz vnd di Gemain dez Conuents doselbs mit dem vorgnanten halben phvnt wienner phenning gelts furbas ledichleich vnd vreyleich allen irn frumen schaffen sulln mit innehaben vnd mit versetzen vnd mit verchouffen vnd geben‚ wem sew wellen an alle wider red vnd alle Irrung. Vnd durich pezzer sicherhait willen so bin ich obgnanter Piligreym der Streiffing vnd ich Elzpet sein hausfrow vnd ich Dyetmar der Streiffing vnd ich Agnes sein hausfrow vnd alle vnser Erben dez vorgenanten halben phvnt wienner phenning gelts der eegnanten Geistlichen herren recht scherm vnd gewer für vns vnd für vnser Erben vnd für alle ansprach, alz aygens Guts recht ist vnd dez Lanndes recht ze Osterreich. Wer aber, daz sew mit recht icht chrieg oder ansprach an dem vorgnantem halben phunt wienner phenning gelts gewünnen, oder daz in doran mit recht icht chrieg oder ansproch auferstuend, von wem daz wer, waz sew dez schaden nement‚ daz schullen wir In allez ausrichten‚ abtragen vnd widercheren an alle Ir müe vnd scheden. Daz lob wir In allez ze laisten mit vnsern trewn an gewer‚ Vnd sew sulln auch daz allez vnuerschaidenlich haben auf vns vnd auf alle dem gut, daz wir haben oder fürbaz gewinnen in Osterreich vnd in vngern, oder wo wir ez haben, ez sey Eribgut oder varund gut, wir sein Lebentig oder tod. Vnd dorüber so geben wir den oftgenanten Geitsleichen den brief zu ainem waren vrchunt der sach, versigilten mit mein vorgenanten Piligreims vnd mit mein obgenanten Dyetmares der Straiffing anhangunden Insigiln, vnd mit der Erbern purger chlain Stat Insigel zu Prukk an der Laytta, di der sach zeugen sind mit irm anhangundem Insigil, yn an schaden. Der brief ist geben nach Christi gepurd Dreytzehen hvndert Iar, dornoch in dem ain vnd achtzgstem iar, dez nesten Vreytags noch Ostern.

Source Fulltext: WEIS, Heiligenkreuz (=FRA II/16, 1859) S. 346-347