ICH Niclas der Pewger Vnd ich Anna sein Hausfraw vnd all vnser Eriben Wir vergechen vnd tun chunt allen den, di disen brief lesent oder horent lesen, Die nv lebent vnd hernach chunftige sind, Das wir mit gutem willen, mit wolbedachtem mut vnd mit gesampter hant, zu der zeit, do wir ez wol getun mochten, verchawft haben vnsers rechten aygens vnsern Pawmgarten, gelegen in den Werd vnder den Ledrern vor Werdertor ze Wienn ze nachst Stephans garten des Brawnschu^echleins, davon man alle iar dyent dem Spital hintz sand Merten, gelegen vor Wydmertor ze Wienn ain phunt wienner phennig geltes vnd nicht mer. Den vorgenanten Pawmgarten haben wir recht vnd redleich verchawft vnd geben mit allen den nutzen vnd rechten, als Wir in unuersprochenleich in aygens gewer herpracht haben, vmb ayndlef phunt wienner phenning, der wir gar vnd gantz gewert sein, Den erbern geistleichen Herren Pruder Cholmann, zu den zeiten Abpt daz dem Heilignchrewtz vnd dem Conuent gemain daselbz vnd allen iren nachkomen furbas ledichleich vnd freyleich ze haben vnd darauf ze Pawen, was si wellen vnd allen iren frumen damit ze schaffen, verchauffen, versetzen vnd geben, wem si wellen an allen irrsal. Vnd sein auch wir ich vorgenanter Niclas der Pewger vnd ich anna sein hausfraw vnd all vnser eriben vnuerschaidenleich des egenanten Pawngartens der vorgenanten geystleichen Herren datz dem Heiligenkrewtz vnd iren nachkomen recht gewer vnd scherm für all ansprach, als aigens recht ist vnd der Stat recht ze Wienn. Wer aber, das sew furbas mit recht an demselben Pawmgarten icht chrieg oder ansprach gewinnen, von wem das wer, Was si des schaden nemen, das schullen wir in alles ausrichten vnd widercheren an allen iren schaden‚ Vnd sullen si das haben auf vns vnuerschaidenleichen vnd auf allen vnserm gut, das wir haben in dem Land ze Österreich, oder wo wir es haben‚ wir sein lebentig oder tod. Vnd das der chawff furbas also stet vnd vnzebrochen beleib, Vnd wann wir selber aigner Insigil nicht enhaben, Darvmb so geben Wir in den brief zu einem waren vrchund der sach versigilten mit der zwaier erbern mann Insigil, Friedreichs von Gvnderstorf purger ze Wienn vnd Hannsen von Harrenstein purger daselbz, die wir vleizzichleich gebeten haben, daz si der sach getzewg sind mit iren Insigiln in an schaden, Darvnter wir vns verpinden mit vnsern trewen, alles das staet ze haben, das vor an dem brief geschriben stet. Der brief ist geben ze Wienn, do man zalt von christes gepurt Drewtzechen Hundert Iar Darnach in dem Achtzigstem Iar, an vnser Vrawen abent ze der Padenuartt.

Source Fulltext: WEIS, Heiligenkreuz (=FRA II/16, 1859) S. 345-346