Wir Alber von gotes gnaden Hertzog ze O^esterreich, ze Steyr, ze Kernden vnd ze Krain, Graf ze Tyrol etc. Tůn chunt Vmb die sibenthalb phunt phenning gelts gelegen zem Gerloz, die die erber Kunigund die Reicherstainerin von vns ze lehen gehabt hat vnd die si durch got zů dem Kloster zem Heiligen Chreutz geschaffet hat, Daz wir lauterlich durch got vnd durch vnser vordern vnd nachkomen trost vnd hail willen die aygenschaft derselben sibenthalb phunt phenning gelts gegeben haben zu dem vorgenanten gotzhaus vnd kloster zem Heiligen Chreutz also, daz doch die vorgenant Reycherstainerin die obgenante gult ir lebtag nutzen vnd innhaben mag, vnd swenn si von diser welt verschaidet, daz dann ain Abt zem Heiligen Chreutz, wer der ye zů den zeiten ist, allen seinen frum damit schaffen vnd tun mag an all irrung, in aller mazz, als er mit andern seinen aigen gůt tůt, die zu seinem gotzhaus gehorend. Mit vrchund ditz briefs. Geben ze Wienn an sand afre tag. Nach Christes geburd dreutzehenhundert iar, dornach in dem zwain vnd achtzigistem iar.

Source Fulltext: WEIS, Heiligenkreuz (=FRA II/16, 1859) S. 350