Wir Cholman von Gotes genaden Probst vnd der Conuent gemayn des Goteshawses vnser Vrown ze Newnburch Chlosterhalben vergehen offenleich mit dem brief vnd tun chunt allen den, die in lesent oder hörent lesen, die nv lebent oder hernach chunftig sint, Vmb den Hof gelegen ze Wetzelndorf vnd alles das, das dartzu gehöret ze veld vnd ze dorff wie das genant ist, den Christan von Hagenprunn, dem Got genad, von vns vnd vnserm Chloster ze lehen gehabt hat vnd den er den erbern geistleichen herren Abt Cholmann vnd dem Conuent gemain datz dem Heylichenchrewtz durich seiner sel hail willen Ledichleich gemacht vnd gegeben hat, Das wir mit gutem willen, mit wolbedachtem mut vnd mit gemainem verainten Rat vnsers Conuents zu der zeit, do wir es wol getun mochten, den egenanten Geistleichen herren datz dem Heyligenchrewtz die aygenschaft des vorgenannten Hofs vnd alles des, das dartzu gehoret, gentzleich gegeben vnd Si der Lehenschaft ledig lazzen haben Also, das si vnd all ir Nachkomen sollen furbas denselben Hof mit aller seiner Zugehorung in rechts freyes aygens gewer Ledichleich vnd freileich haben vnd allen irn frume damit schaffen, verchauffen, versetzen vnd geben, swem si wellen an allen irrsal, als aygens recht ist vnd des Lannds recht ze Osterreich. Vnd sullen auch wir noch all vnser Nachkomen furbas auf den vorgenanten Hof vnd auf all sein Zugehörung weder vmb Lehenschaft noch vmb chainerlei ander Sache, wie die genant ist, nymmermer chain ansprach noch vodrung haben noch gewinnen, noch chains rechtens darauf iehen in dhainen wegen. Vnd daruber so geben wir für vns vnd fur all vnser Nachkomen In den brief zu einem waren vrchunt der Sach versigilten mit vnsers obgenanten Probst Cholmans vnd des Conuents gemain des vorgenanten Chlosters ze Newnburch paiden anhangunden insigiln. Der geben ist nach kristi gepurt Dreutzehen Hundert Jar darnach in dem vier vnd Achtzgistem iar, des nesten freitags vor sand Pertelmes tag des Zwelifpoten.

Source Fulltext: WEIS, Heiligenkreuz (=FRA II/16, 1859) S. 365