Wir Alber von gots genaden Hertzog ze Österreich, ze Steyr, ze Kernden vnd ze krain, graf ze Tyrol etc. Bekennen vnd tu^en chunt offenleich mit dem brief, Das wir den erbern geistlichen in got vnsern lieben anda^echtigen . . dem Abt vnd dem Conuent des Gotzhauses zum Heiligen Chre^autz für die wisen gelegen ze Lachsendorf, die Si Vns nach Vnser bete geben habent zu vnserm Haus daselbs ze Lachsendorff ewichleich zu haben, gegeben haben vnd geben auch mit dem gegenwurtigen brief fur Vns vnd fur alle vnser erben vnd Nachkömen ewichlich zu haben alle iar Achtzehen phunt wienner pfenning von vnserm Weinvngelt ze Pfaffsteten, vnd die sol in nu furbas ewikleich ein yekleich vnser Vngelter daselbs raihen alle iar auf Phingsten an alles vertziehen vnd widered. Dauon gepieten wir fur vns vnd all vnser erben vnd Nachkömen allen vnsern Vngeltern daselbs gegenwurtigen vnd künftigen, daz Si nu furbaz ewiclich die obigen geistlichen Leut vmb dieselben Achtzehen phunt alle iar auf phingsten vnuertzogenlich auzrichten, Wan wir in die allweg an irer Raittung legen vnd abziehen wellen. Wer aber, daz hienach in chünftigen zeiten Wir oder vnser erben den Vngelt wider abliessen geen, So sullen wir denselben geistlichen leuten die obgenanten Achtzehen phunt gelts anderswa auzzaigen vnd auzrichten auf guter gewisser vnd aigener gulte, die in gelegen sei vngeuerlich. Mit vrchund ditz prief. Geben ze Wienn an dem heiligen Auffarttag, Nach Kristes gepurd Drewtzehenhundert iar, darnach in dem Vier vnd Achtzigisten Jare.

Source Fulltext: WEIS, Heiligenkreuz (=FRA II/16, 1859) S. 364