Ich Niclas Vnd ich Dietreich gebruder die Trokkendorffer vnd all vnser Erben Wir vergehen vnd tün kunt allen den, die den brief lesent oder hörent lesen, Die nv lebent vnd hernach chunftig sint, Daz wir an vnser selbs stat vnd an Lewpolts stat des Trokkendorffer vnsers Pruders, der zu den zeiten ynner landes nicht ist, vns gantz vnd gar verrichtet haben nach Erber lewt Rat mit den Erbern Geistleichen Herren, dem Abbt vnd dem Conuent datz dem Heiligenchrewtz vm alle die ansprach, die wir gehabt haben auf daz halb lehen, daz dem Weycharten von Wetzeldorf gestanden ist, vnd daz die Herren von dem Heyligenchrewtz vmb zwaintzig phunt von ym geledigt haben; Vnd den zehent auf vierdhalb Yevch akchers, den Lorentz Chlinsler innhat; Vnd den zehent auf zwayn halben weyngarten vnd ain öden weingarten Vnd auch drithalb vnd zwaintzig phenning gelts gelegen auf äkchern, die die Wetzeldorfer innhaben, daz alles gelegen ist zu Wetzeldorf vnd vnsers Öhems Christans von Hagenprunn gewesen ist; Vnd swaz zu den selbigen gütern gehöret, Daz die vorgenanten Geistleichen herren gechauft haben von Jüdlein Rötlein, dem Juden ze Newnburch markchhalben, dem es für sein geltschult für haubtgut vnd für schaden veruallen ist, swaz wir auf dieselben Güter ansprach gehabt haben von erbtails wegen, so vns daran von vnserm Öhem Dietreichen des vorgenanten Christans sun, dem got genad, anerstorben mocht sein, Also daz wir mit wolbedachtem müt vnd gütem willen vns der vorgenant Gu^eter vertzigen haben vnd vertzeichen vns der gentzleich mit dem brief, daz wir, noch der egenant Lewpolt vnser Pruder, noch alle vnser Erben fürbaz darauf chains rechtens gehen, noch chain ansprach darauf nymmermer haben, noch gewinnen süllen in chainem weg. Wer aber daz den vorgenanten Geystleichen Herren datz dem Heyligenchrewz oder irn nachkomen fürbaz an den vorgenanten gütern icht chriegs oder invell auferstunden von vns, oder von dem egenanten Lewpolten vnserm Pruder, oder von vnsern Erben, Swaz si dez schaden nement, wie der schad genant ist, Daz süllen si haben auf vns vnd auf allem vnserm gut, daz wir haben in dem Lannde ze Österreich oder wo wir es haben. Vnd daz die berichtigung vnd vertzeichnung fürbas also staet vnd vntzerbrochen beleib, darüber so geben wir In den brief ze einem warn vrchund der sach versigilten mit vnsern insigiln Vnd mit vnsers vettern insigil, Wernhartes des Trokkendorffer, den wir dez fleysichleich gepeten haben, daz er der sach getzevg ist mit seinem insigil, Im an schaden. Der brief ist geben noch Christes gepurt drewtzehenhundert iar darnach in dem vier vnd||
achtzgistem Jar, an sand Thomas tag dez zwelpf poten.

Source Fulltext: WEIS, Heiligenkreuz (=FRA II/16, 1859) S. 367-369