Urbanus episcopus Seruus seruorum dei. Venerabili fratri . . Episcopo Patauiensi Salutem et apostolicam benedictionem. Sacre religionis, sub qua dilecti filii Abbas et Conuentus Monasterii Sancte Crucis in Austria, Cisterciensis ordinis, Patauiensis diocesis deuotum et sedulum exhibent domino famulatum, promeretur honestas, ut uotis eorum illis presertim, per que dicti Monasterii utilitas procuratur, fauorabiliter annuamus. Exhibita siquidem nobis nuper pro parte dictorum Abbatis et Conuentus petitio continebat, quod olim accepto per bone memorie Guidonem Episcopum Portuensem, tunc titulo sancte Cecilie presbiterum Cardinalem et in partibus illis apostolice sedis legatum, quod propter magnam frequentiam hospitum tam pauperum quam aliorum ad ipsum Monasterium pro tempore confluentium quam alias ipsis ex fructibus, redditibus et prouentibus dicti Monasterii, que erant tenues et exiles, congrue sustentari et alia eis incumbentia onera commode supportare nequibant, dictus Episcopus tunc legatus Episcopo Patauiensi pro tunc existenti eius proprio nomine, non expresso auctoritate sue legationis per suas inter cetera dedit litteras in mandatis, ut ipse Episcopus Patauiensis de premissis diligenter inquireret et, si per inquisitionem huiusmodi reperiret, ea ueritate fulciri, parrochialem ecclesiam Sancti Georgii de Alech dicte diocesis, que ad presentationem dictorum Abbatis et Conuentus communiter spectabat et spectat, eidem Monasterio perpetuo unire et incorporare ac annectere procuraret, Ita quod cedente uel decedente Rectore ipsius ecclesie, qui tunc erat, uel ecclesiam ipsam alias quomodolibet dimittente liceret dictis Abbati et Conuenti, eandem ecclesiam libere apprehendere et licite retinere, et quod bone memorie Albertus Episcopus Patauiensis, postquam super premissis iuxta dictarum litterarum seriem diligentius inquisierat eaque inuenerat fore uera, dictam ecclesiam, cuius Quadraginta florenorum auri cum omnibus iuribus et pertinentiis suis eidem Monasterio, cuius Centum et Quadraginta Marcharum argenti fructus redditus et prouentus secundum communem exstimationem ualorem annuum, ut asseritur, non excedunt, predictarum litterarum uigorem etiam per ipsius Alberti Episcopi certi tenoris litteras perpetuo uniuit, incorporauit et annexuit, reseruata nichillominus per eundem Albertum Episcopum de huiusmodi fructibus, redditibus et prouentibus congrua portione pro perpetuo Vicario in dicta ecclesia instituendo, ex qua idem Vicarius congrue sustentari, episcopalia iura soluere et alia sibi incumbentia onera supportare ualeret, prout in Episcopi Portuensis, tunc legati et Episcopi Patauiensis predictorum litteris prefatis et eorumdem sigillis sigillatis dicitur plenius contineri. Quare pro parte dictorum Abbatis et Conuentus nobis humiliter fuit supplicatum, ut, non obstante, quod littere predicti Episcopi Patauiensis per Tabellionem Subscripte et signate non fuerint, cum iuxta consuetudinem patrie illius priuilegia Episcopi Patauiensis pro tempore existentis per notarios publicos subscribi et signari, ut asseritur, non consueuerunt, unioni annexioni et incorporationi predictis robur apostolice firmitatis adicere de speciali gratia dignaremur. Nos itaque huiusmodi supplicationibus inclinati fraternitati tue, de qua in hiis et aliis specialem in domino fiduciam obtinemus, per apostolica scripta comittimus et mandamus, quatinus, si tibi constiterit, quod sigilla predicta autentica existant, unionem, anexionem et incorporationem predictas ex certa scientia auctoritate apostolica defectu non obstante predicto confirmare procures, reseruata tamen de huiusmodi fructibus, redditibus et prouentibus ipsius ecclesie, si prius assignata non fuerit, pro perpetuo Vicario in ea domino seruituro congrua portione, de qua congrue sustentari, episcopalia iura soluere ualeat et alia sibi incumbentia onera supportare. Datum Janue viii°. kalendas Junii, Pontificatus nostri Anno Nono.

Source Fulltext: WEIS, Heiligenkreuz (=FRA II/16, 1859) S. 372-373