Wir Michel der Gewchramer, zu den zeiten Purgermayster, vnd Mu^enzzmeiser, Niclas Weyspacher Spitalmayster vnd der Rat gemayn der Stat ze Wienne Vergehen vnd tun kunt allen den, die den brif lesent oder horent lesen, die nu lebent vnd hernach chunftig sind, Das wir mit gutem willen vnd mit wolbedachtem mute vnd mit gemaynem veraintem rat zu der zeit, da wir es wol getun mochten, an des vorgenanten Spitals stat verchaufft haben alle die Gu^eter vnd gült, die dasselb vnser Spital gehabt hat zu Erdprust, die rechts aygen sind, als hernach benant ist. Von erst aynen Hof gelegen daselbens zenegst Niclas hof des amptmans vnd hundert vnd zwayntzig Jewchart akchers, die daryn gehörent, vnd fümf Jewch weingarten vnd aynen pawmgarten bey der Obern Mül, die auch an denselben Hof gehörnt, vnd aynen gantzen weingarten vnd acht phunt sechs schilling vnd fümf vnd zwaintzig phenning wienner müntz geltes auf bestiftem gut behawster holden vnd auf vberlent Ekchern, weingarten vnd Pawmgarten vnd auf vogttgütern vnd hundert vnd zwelif Metzen habern gelts vogttfuters vnd vogttay auf behawsten gütern vnd auf vberlent fümf vnd dreitzig huener, gelts vnd vogttay auf behausten gutern vnd auf vberlent, der sol ygleichs huen vir phenning wert sein; Vnd sechs vnd fünftzig Ches geltes vnd vogttay auf behawsten gutern vnd auf vberlent, der sol ygleicher Ches ains phenning wert sein; Vnd zehenthalben Emmer weyns geltes perkchrechts auf weingarten vnd aynlef phunt wienner phenning geltes, gelegen auf der nydern Mül vnd alle Gericht, ynnerhawses vnd auzerhawses, ze dorf vnd ze veld, an allayn swaz an den tod get, vnd gantzen zehent auf zwaintzig Lehen daselbens chlainen vnd grozzen ze veld vnd ze dorf. Die vorgenanten Güter vnd gult alle mitsambt dem Gericht vnd zehent, als vorgeschriben stet, das daz vorgenante Spital zu Erdprust gehabt hat vnd swaz zu ym allen gehöret an vrbar, ze holtz, ze veld vnd ze dorf, es sein hof, Ekcher, weingarten, pawmgarten, phenninggu^elt, haberngült, huenergult, Chesgült, perkchrecht vnd purkchrecht, es lige auf behawsten gutern, auf vberlent vnd auf vogttgütern vnd alles das, daz zu denselben Gütern vnd gulten vnd auch zu dem Gericht vnd zehent gehöret, Es sey gestifft oder vngestifft, versucht oder vnuersucht, wie es alles genant, oder wa es gelegen ist, nichts ausgenomen, alles onbelozzen gantz vnd gar an alle austzug haben wir recht vnd redleichen verchawfft vnd geben mit allen nutzen, ern vnd rechten, als dieselben güter vnd gült alle mitsambt dem Gericht vnd zehent, als vorbenant ist, von alter in aygens gewer herchomen sind, Dem Erwirdigen geistleichen herren Bruder Cholman, zu den zeiten Abbt des Gotzhawses datz dem heiligen Chrewtz vnd dem Conuent gemayn daselbens vnd allen irn Nachkomen Vmb Sybenhundert phunt wienner phenning, der wir an des obgenanten Spitals stat an beraytschafft virhundert phunt wienner phenninge gar vnd gentzleich verrichtet vnd gewert sein, Vnd für die andern drewhundert phunt habent die vorigen Geystleichen herren dem egenanten vnserm Spital zu einem rechten Chawf gut gegeben Ir Padstuben, gelegen bei der Himelporten ze Wienne nach des Chawfsbrifs lawttung, den si daruber besunderleich gegeben habent, Das wir also an des vorgenanten Spitals stat der egenanten Sybenhundert phunt gar vnd gentzleich verrichtet vnd gewert sein, Mit der beschaidenhait, das die vorgenanten Geystleichen herrn, Bruder Cholman vnd der Conuent gemayn datz dem heiligen Chrewtz vnd alle ir Nachchomen die obgenanten Güter vnd gult alle mitsampt dem Gericht vnd dem zehent vnd swaz dartzu gehört, als vorgeschriben stet, sullen fürbaz ledichleichen vnd freileichen haben vnd allen irn frumen damit schaffen, verchawffen, versetzen vnd geben, wem si wellen an allen irrsale. Vnd zu einer pezzern sicherhait so setzen wir vns obgenanten Michel der Gewchramer purger maister, Niclas Weyspacher Spitalmaister vnd der Rat gemain der Stat ze Wienne mitsampt vnsern Nachchomen vnuerschaidenleich vber die obgenanten Güter vnd gült mitsampt dem Gericht vnd dem zehent vnd swaz zu im allen gehöret, als vorgeschriben stet, den obgenanten geistleichen herrn vnd dem Conuent gemain datz dem heiligen Chrewtz vnd allen irn Nachchomen zu rechten gewern vnd scherm für alle ansprach, als aygens recht ist vnd des Lanndes recht zu Österreich. Wer aber, daz In an den egenanten gutern vnd gulten vnd an aller irer zugehorung icht chrig oder ansprach auferstunde, von swem daz wer, mit recht oder ob In mit recht daran icht abgieng, Swaz si des schaden nement, daz sullen wir In alles ausrichten, ablegen vnd widercheren an allen irn schaden vnd sullen auch Si daz haben auf vns vnd vnsern Nachchomen vnuerschaidenleich vnd auf allem dem gut, Erbgut oder varund gut, wie daz genant, oder wa daz gelegen ist nichts ausgenomen‚ daz zu dem vorgenanten vnserm Spital gehoret. Vnd das der chawf furbaz stet vnd vntzerbrochen beleyb, Daruber so geben wir In den brif zu einem warn vrchund vnd zu einer ewigen vestnung der sach, versigillten mit der obgenanten Stat ze Wienne chlainem vnd des Spitals bayden anhangunden Insigilln. Der brif ist geben ze Wienne Nach Kristi gepurd drewtzehen Hundert Iar darnach in dem zway vnd Newntzigistem Iar an Gotesleychnams Abennde.

Source Fulltext: WEIS, Heiligenkreuz (=FRA II/16, 1859) S. 380-382