Ich Hans etwan Richter zu Hawsprünn vnd Ich Kathrey sein Hausfraw vnd all vnser Erben wir vergehen vnd tun künd offenleich mit dem briff Gegenwurttigen vnd Chümftigen, daz wir mit wollbedachtem müt vnd mit gesampter hant, vnd mit veraintem Ratt vnserr nachsten frewnt zu der zeit, da wir iz mit Recht wol getun machten, vnd mit vnsers genedigen grüntherren hant, des erwirdigen geistleichen Herren Abpt Chollmann, zu dem heiligen Chrevtz Recht vnd redleich verchaufft haben vnsern Hof gelegen daselbs zu Hausprunn, zu nachst Perichtolden vnd zunachst Gergen dem prenner mit aller seiner zu gehorüng zu veld vnd zu dorff, gestifft vnd vngestifft, versucht vnd vnuersucht, nichtz auzgenomen alles inbeslassen vnd dauon man alle iar dint zu Rechtem purchkrecht dem obgnanten vnserm genedigen Herren, Abpt Cholman vnd dem gantzem Conuent zu dem Heiligen Chrewtz viertzigk Wienner phennig an Sand Gergen tag vnd ainen Chastenmütt waitz an Sand Gilgen tag vnd nicht mer, den vorgenanten Hoff mit aller seiner zugehorüng haben wir Recht vnd redleich verchaufft vnd geben mit allen den nutzen, ern vnd rechten, als wir in vnuersprochenleich in purchkrechtes gwer herpracht haben vnd als er von alter her chomen ist, vmb zway vnd zwanitzigk phunt wienner phennig, der wir gantz vnd gar verricht vnd gewert sein, dem vorgenanten vnserm gruntherren, dem Erwirdigen geistleichen Herren Abpt Cholmann, zu dem heiligen Chrewtz vnd dem gantzem Conuent daselbs furbaz ledichleich vnd freileich zu haben vnd allen iren frumen damit zu schaffen, verchauffen, versetzen vnd geben, wem si wellen an allen chrig vnd irsal. Vnd zu ainer pessern sicherhait so setz ich mich obgenanter Hans vnd ich obgenantew Katrey mit sampt vnsern Erben vnuerschaidenleich vber den vorgenanten Hof vnd waz darzu gehoret zu rechten gwern vnd scherm fur alle ansprach, vber daz purchkrecht als purchkrechtz recht ist vnd des Lanndes recht zu Osterreich. Wer aber, daz si daran icht chrig oder ansprach gewinnen, von wem daz wer mit recht oder ob in mit recht daran icht abgieng, waz si des schaden nement, daz schullen wir in alles auzrichten vnd widerchern an allen iren schaden vnd schullen auch si daz haben vnuerschaidenleich auff vns vnd auff allem vnserm gut, daz wir haben in den Landen zu Osterreich, oder wo wir iz haben, wir sein lebentig oder tod. Vnd daz der chauff vnd der scherm furbas also stet vnd vntzebrochen beleib, dar vber so geben wir in den briff versigelt, Wenne ich obgenanter Hans vnd ich Katrei sein hausfraw aygenner insigel nicht inhaben, so verpint wir vns mit vnsern trewn an aydes stat vnd an geuer hinder der Erbern Insigel, Hannsen von Persenpewg, die zeit purggraf zu Mistelbach vnd Hansen des Jüngern Schretenperger vnd Otten des Wulfleinsdorffer, di wir dar vmb vleizzig gepeten haben, daz sie der sach zewgen sind mit iren anhangunden Insigeln, in an schaden. Der briff ist geben nach christi gepurd drewtzehenhundert iar darnach in dem zway vnd Newntzigistem iar, des Mitichen nach Sand Johannes tag Gotes thauffer zu Süniwentten.

Source Fulltext: WEIS, Heiligenkreuz (=FRA II/16, 1859) S. 382-383