Ich Paul der Garser vergich vnd tun kund allen den, die den brief lesent oder horent lesen, die nu lebend vnd hernach künftig sint, das ich mit aller meiner erben gutem willen vnd gunst, mit wolbedachtem mut zu der zeit, da ich es wol getun mochtt, vnd mit meins lehenherren hannt, des edeln herren hern Ewerharts von Chappel verchawfft han meins rechten lehens, das ich von Im ze lehen gehabtt han, mein halbs lehen gelegen ze erdprust zenachst den dewtschen herren vnd alles das, das dartzu gehoret, ze veld vnd ze dorff, es sey gestifft oder vngestifft, versucht oder vnuersucht, wie so das genant ist, do man alle iar von dint achtzig wienner phennig ze rechtem dinst, dartzu han ich verkawfft alle die Recht, die ich gehabtt han an der geistleichen Herren mül von dem Heiligen Chräwtz, gelegen daselbens ze erdprust vnd swaz dartzu gehoret, das vorgenant halb lehen vnd swaz dartzu gehoret, vnd alle die Recht, so ich an der vorgen mül gehabtt han, als vorgeschriben stet, han ich Recht vnd redleichen verchawfft vnd geben mit allen den nutzen vnd rechten, als ich es alles in lehens gwer herpracht han vnd als es mit alter herchoms ist, vmb syben phunt wienner phenning, der ich ganz vnd gar verrichtet vnd gewert pin, dem erwirdigen geistleichen herren Pruder Niclasen, ze den zeiten Abbtt vnd dem Conuent gemain des vorgenanten Chlosters datz dem Heiligen Chrewtz vnd irn nachkomen furbas ledichleichen vnd freyleichen ze haben vnd allen iren frumen damit ze schaffen, verchawffen, versetzen vnd geben, wem sy wellen an allen irrsal. Ich pin auch mit sampt allen meinen erben vnuerschaidenleich des vorgenanten halben lehens vnd swas dartzu gehoret vnd aller der Rechten, so ich an der vorgenanten mül gehabtt han, als vorgeschrieben stet, der egenanten geistleichen herren datz dem Heiligen krawtz vnd irer Nachkomen Rechtt gewern vnd scherm fur alle ansprach, als lehensrecht ist vnd des lanndes recht ze Osterreich. Wer aber, das In furbas an dem selben halben lehen vnd seiner zugehorung vnd an allen den rechten, so ich an der vorgenanten mul gehabtt han, so vorgeschriben stet, mit recht icht abgieng oder ob In mit recht icht kriegs oder ansprach daran aufferstund, von wem daz wer, Swaz sy des schaden nement, daz sullen wir In alles ausrichten vnd widerchern an alln irn schaden, vnd sullen auch sy das haben auff vns vnd auff allem vnserm gut, daz wir haben in dem Lannde ze Osterreich‚ oder wo wir es haben‚ wir sein lembtig oder tod. Vnd datz der kawff furbas also stet vnd vntzebrochen beleib‚ darüber so gib ich In den prieff ze einem waren vrkund der sach, versigilten mit meinem angehangen insigil vnd mit Laslabs insigil des Hörings vnd mit Weykarts insigil des Herings, seins pruders, die der sach getzeugen sint mit irn insigiln, In an schaden. Der brieff ist geben nach krists gepurdt drewtzehen hundert iar darnach in dem Sechs vnd newntzgistem Iar, an dem heiligen Phingst Abennt.

Source Fulltext: WEIS, Heiligenkreuz (=FRA II/16, 1859) S. 389-390