Wier Albrecht von gotes genaden Hertzog ze Osterreich, ze Steyr, ze Kernden vnd ze Krain, graue ze tyrol etc. Bekennen offenlich mit dem brieff fuer vns vnd vnser erben, das wir den ersamen geistlichen vnseren lieben andechtigen N. dem Abbt vnd dem Conuent des klosters zvm Heyligenkreutz durch weilent vnserr vorderen loblicher gedachtnutz, vnser, vnserr liebem frawn vnd mueter, vnserr liebem gemahelen vnd vnserr nach komen Seelenhail vnd trost willen vnd sunderlich durch merung gotsdiensts geben haben vnd geben auch wissentlich mit disem brieue vnseren weinungelt daselbs zem heiligenkreutz, von dem man vnseren vngeltern ze Wien ierlich geraihet vnd geben hat zweliff phunt phenning, Also das sy vnd dasselb ir gotshaws dyselbem zwelif phunt phenning ierlichs vngelts fuerbaser selber ynnemen, vechsen vnd allem yerem frummen damit schaffen schullen vnd mugen, wie yn das fuegt, als mit anderen ieren nutzen angeuere; Doch also, das sy darvmb yn dem selben yerem gotshaws auf vnser frawn altar auf dem karner bey fuer ewichlich alle wochen drey mess von vnser frawn vnd alle iar zv yekleichen vnser frawn tagen des abents ain vesper vnd ain Complet vnd des morgens an den selbigen tegen ain ampt von vnser frawn singen vnd haben sullen, als denn yeglicher tag bringet vnd aischet nach laut der brieff, dy sy vns daruber habent geben. Geschech aber in kunftigen zeiten, das vnser vngelt gemainichlich yn vnserem landen abgenomen, oder das wier yn solich gab, als vorgenannt ist, widerrueffen wuerden, So sullen wier, vnser Erben oder nachkomen den Obgenanten geystlichen Leuten vnd yerem gotzhaus dy obgeschriben tzwelf phunt phenning yerlichts vngelts anderswa an gelegen steten auf anderen vnseren gulten erstatten vnd aufrichten Vngeuerlich. Mit vrkund ditz brief Geben ze Wienn an Mitichen vor dem Palmentag Nach kristi gepurt dreutzehundert Iar darnach yn dem Sibentvndnewntzigisten Iare.

Source Fulltext: WEIS, Heiligenkreuz (=FRA II/16, 1859) S. 393-394