Ich Pilgreim von Pucheim obrister Drugsetz in Österreich, meins gnedigen Herren Hertzog Albrechts ze Österreich etc. Hofmeister vergich für mich, für mein erben vnd nachkomen vnd tün chünd offenlich mit dem Brif allen den, di in sehent, hörent oder lesent, daz ich bedechtlich mit gutem willen, do ich daz rechtlich wol getun macht, meins rechten frein aigens recht vnd redlich geben hab zu einem rechten auswechsel dem Erbürdigen geistleichen Herren hern Niclasen, zu den zeiten Abbte zu dem Heiligenchreutz, seinem Conuentt vnd dem Gotzhaws daselbst vir vnd fümftzig phenning wienner phenning gelts, di man alle Iar dint an Sand Michels tag, dreytzehen phenning von ainer Hofstat gelegen ze Dreskirichen, da yetz Hans Schuster auf sitzt, do weilent ein Padstuben gelegen ist, zu nagst Lewbleins dez Flöchels haws, ainer seitten vnd zu nagst Paulen dez Weinrůffer haws, an der andern seitten, vnd ain vnd virtzig phenning wienner phenning gelts vberlend auch gelegen ze Dreskirichen auf ainn virtail akcher in der Gruntwisen gelegen, zu nagst Stephann Hawgen vnd hat yetz inn Meinhart der Giel. Darwider habent mir vnd mein erben di obgenanten Herren von Heiligenchreutz herwider geben ze auswechsel vir vnd fümftzig phenning wienner phenning gelts, di man dint an Sand Michels tag, als daz Ir brif weist vnd Lautt, den ich von in han. Die obgenanten vir vnd fumftzig phenning gelts auf den vorgenanten gütern hab ich in geben vnd ingeanttwortt mit allen wirden, Eren, rechten vnd nutzen lediklich vnd freilich innetzehaben, ze nutzen vnd ze messen vnd allen iren frumen damit ze schaffen, mit versetzen, mit verchauffen vnd damit tun vnd handeln, wie sew verlust, an all mein vnd meiner erben irrung, hindernusse vnd widerred angeuer. Vnd daz hat sich also gewandelt vnd verlauffen mit vnser baider tail amptlewt handen, Stephans dez Zehentner vnd Mainharts des Giel. Wir sein auch der obgenanten vir vnd fümftzig phenning geltes auf den egenanten gu^etern der vorgenanten Herren vom Heiligenchreutz vnd Irer nachkomen recht gewern vnd scherm für alle ansprach, als freis aigen recht vnd dez Landes recht ist in dem Lande ze Österrich. Wer auch, daz in an den obgenanten vir vnd fümftzig phenning gelts icht abging, oder ob Sy icht chrieg oder ansprach mit recht daran gewunnen, von wem daz wer, daz sullen wir in ausrichten vnd richtig machen an allen iren schaden. Tu^en wir dez nicht, waz Sy dez schaden nement, diselben scheden sullen Sy haben datz vns, ze vnsern erben vnd nachkomen, vnd auf allem vnserm gut, daz wir haben in dem Lande ze Österrich oder wo wir daz haben, wir sein Lembtig oder tod. Mit vrchunde ditz Brifs den ich obgenanter Pilgreim von Pucheim den obgenanten Herren vom Heiligenchreutz vnd allen iren nachkomen gib Besigelt mit meinem anhangunden Insigel, vnd der sach sint getzewg mein lieb Bru^eder Albrecht vnd Georig von Pucheim mit iren anhangunden Insigeln. Der brif ist geben, da man zalt von Christi gebu^erde dreutzehenhundert Iar darnach in dem acht vnd Newntzigistem Iar, an Phintztag vor Sand Johanns tag ze Sunebentten.

Source Fulltext: WEIS, Heiligenkreuz (=FRA II/16, 1859) S. 395-396