Ich Hanns der Schenkch von Ried und ich Balpurkch sein hausfraw und all unser erben, wir vergehen und tu^en kunt allen den, die den brief lesent oder ho^erent lesen, die nu^e lebent oder hernach kunftig sind, das wir mit gu^eten willen, mit verdachtem mu^et und mit gesambter hannd und nach rat unser frewnt zu^e der czeit, do wir es wol getu^en mochten, verchaufft haben unsers rechten aygens fu^enf schilling und achtzehen phening Wienner munns gelts gelegen czu^e Ra^enestorff auf siben halben u^eberlent lehen und auf siben hofsteten, die czu^e den zeiten die hernach wenant lewt dienent:||
von erst Janus Chrawker von siben viertail lehen sybentzig phening, Jorig Herbart von aym halben lehen zwayntzig phening, Vl Smydinn von Chrud von aynem halben lehen zwayntzig phening, Pawl Olbe^ar von aynem halben lehen zwayntzig phening und Symon Kolman von aynem viertail lehen zehen phening.||
Darnach von den hofsteten: von erst Janus Wielannd von ayner hofstat vier phening, Jorig Herbart von ayner hofstat vier phening, Janus Chrawcher von zwayn hofsteten acht phening, Jakob Laybel von ayner hofstat vier phening, Thoman von ayner hofstat vier phening, Nyclas Schrwber von ayner hofstat vier phening.||
Darnach haben wir verchauft ganczen zehent auf sechs ganczen lehen gelegen daselbigs ze Re^ana^estorff, grozzen und chlaynen ze veld und ze dorff, den wir von dem hochgeborn fursten hertzog Albrecht ze Osterreich ze lehen gehabt haben, der uns denselben zehent von gnaden geaygent hat nach des brefs sag, der dau^eber ist, und alles das, das tzw^e den vorgenant gu^elten und zehenten gehoret ze veld und ze dorff, es sey gestifft oder ungestifft, verschu^echt oder unversu^echt, wieso das genant ist. Die vorgenant gu^eld und zehent und alles das, das dartzu^e geho^eret, als vor geschriben stet, haben wir recht und redleich verchaufft und geben mit allen den nutzen, eren und rechten, als wir si in aygens gewer herpracht haben und als si mit alter herkomen sind, umb hundert phunt und umb funf und zwayntzig phunt Wienner phening, der wir gantz und gar verricht und gewert seyn, dem erbirdigen geistleichen hern pru^eder Nyclasen czu^e den zeyten abbt datz dem Heyligen Krawtz und dem convent gemayn daselbigs und allen iren nachko^emen, furbas ledikleich und freyleich ze haben und allen iren frumen domit ze schaffen, verchawffen, versetzen und geben, wem si wellen an allen irrsal, und durch pesserr sicherhait so setzen wir uns obgenant ich Hanns der Schenk und ich Balpurkch sein hausfraw mitsambt allen unsern erben unverschaidenleich u^eber die vorgenant gu^elt und zehent und u^eber alles das, das dartzu^e geho^eret, das vor geschriben, den egenant geistleichen herrn datz dem Heyligen Krawtz und allen iren nachkomen ze rechten gewern und scherm fur all ansprach, als aygens recht ist und des lanndes recht zw^e Osterreich. Wer aber, das in furbas an denselben gu^eld und zehent und an all ir zu^egehorung, als vor wenant ist, mit recht icht abgieng oder im mit recht icht chriegs oder ansprach auferstund, von wem das wer, swas si des schaden nement, das schullen wir in alles ausrichten und widerchern an allen iren schaden, und sullen auch si das haben auf uns unverschaidenleich und auf allem unserm gu^et, das wir haben in dem lannde ze Osterreich oder wo wir es haben, wir sein lebentig oder tod. Und das der chauff furbas also stet und untzewrochen weleib, daru^eber so gib ich obgenanter Hanns der Schenkch fur mich, fur mein hausfrawn und fur all unser erben in den brief zu^e einen warn urchund der sach, versigilten mit meinem angehangen insigil und mit des erbern Hannsen insigil von Dietreichstockh, die zeit vorstmaister in Osterreich, und mit Wolfhartz insigil des Inprukker und mit Ulreichs insigil des Eybespruner, die der sach getzewgen sind mit iren angehangen insigiln, in an schaden.||
Der brief ist geben datz Wienn nach Christi gepurd in dem viertzehenhundertistem jar, des nechsten sambtztags vor [... Plica!].