Ich Hanns Lewbfa^er und ich Peter Chüczmagen paid burger zw Newnburg markchtzhalben, wir verjehen für üns, unser hawsfrawn und für all unser eriben offenleich mit dem brief, das wir unverschaidenlich gelten süllen dem erbern Vlreichen Rietenburger, burger zw Passaw, seiner hawsfrawn und allen irn eriben umb gwannt hunndert ungrischer gulden, der wir sew an verziehen beczalen süllen, vierczkch pfunt Wienner pfenning auf sand Steffans tag im snit schirst chunftigen zw Passaw in der stat mit Wienner pfenning solich gelt, als dann dy selb zeit zw Passaw gib und gäb ist, an gever, und dy annder summ gulden, was dy gepürdt, auf sand Michels tag darnach, aber schirst chunftigen, süllen wir sew beczalen mit gulden, newn, ungrischen, oder tukaten, dy güt in gold sein, ir rechtew wag haben, gib und gäb sein, an gever. Täten wir dez nicht, was sy dann dez zw yeder frist scheden na^emen an christen, an juden oder in anndern sachen, wie der schad genannt wär, chainen schaden ausgenömen, ir ains slechten wartten an aid und unberecht darumb zw glauben, denselben schaden allen mit sambt dem hawbtgüt wellen wir in abtün und gennczlich widerchern. Sy süllen auch das alles haben zw üns unverschaidenleich zw unsern trewn also, was an unser ainem und an seinem güt abgee, das das an dem anndern und an seinem güt wider awfgee, also das sich unser chainer mit seiner anczal nicht abschaiden sol, wa wir dy hab und das güt überal haben, gewinnen oder lassen, inner und auzzer lannds, ez sey erib, aigen, lehen oder varund gut, nichtz awsgenömen, besücht und unbesücht, derselben unserr hab und güt mügen sy sich oder ir anwald darumb wol unnderbinden, mit gricht oder an gricht, und die verseczen, verchauffen als verr, biz das sy hawbtgütz und scheden davon gennczlich beczalt werdent, das ist alczeit unser güter will und maynung, und wer in dez hilft mit rat oder tat, der oder dyselben süllen dez gein üns und gein allermenichleich unengolten sein an gever. Wär awch, das icht chrieg, stözz oder frömdung awferrstünnden zwischen dez lannds in Ostereich, der stat zw Passaw oder anndrer lannt und lawtt, wie sich das fügt, dez süllen sy an irr vorgenantten summ gulden unengolten sein an gever, und wer den brief mit irm willen innhat, fürpringt oder zaigt, der hat all dy recht, dy in daran geschriben sind.||
Mit urkund dez briefs, der besigelt ist mit der erbern weysen Thomann dez Pannkofer und Lienharten dez Zeller, paider burger zw Passaw, anhanngunnden insigeln, dy wir paid fleizziglich darumb gepeten haben, in und allen irn eriben an schaden, verpinden uns darunnder unverschaidenleich mit unsern trewn für uns, unser hawsfrawn und für all unser eriben stetichleich an gever.||
Der brief ist geben an sand Vlreichs abent nach Christi gepurd virczehenhunndert und im dreuczehenden jare.