Ich Vlreich von Sannd Pollten, die zeit des hachgebarn fursten meins gena^edigen herren herczog Albrechts, herczogen ze Österreich etc. ambtman in der Schefstrazz ze Wienn, vergich offenleich mit dem brif, das fur mich ko^am, do ich sas an offem gerichtt, bru^eder Peter Ha^essel dacz dem Heyligenchreucz und klagt mit varsprechen an des goczhau^es stat und an des convents gemain doselbs dacz dem Heyligen Chreucz au^ef ein hau^es und garten daran mit seiner zugehorung, gelegen ze Erdpu^erkch ze nagst Hannsen des Reindlein haus, umb zwen meczen spenatsamen uberlennt, die mo^an in alle jar ja^erleich dovo^an dienen sol, und pat darumb gerichts. Do engegen kom Mathes vo^an Eger, der die vorgenanten gu^etter innhet, und verantburt sich auch mit varsprechen und pegeret urku^end darumb ze horen, wie die gu^elt auff die vorgenanten gu^eter chomen wa^eren. Das verantburt pru^eder Peter auch mit varsprechen und jach, die gutter weren i^er gebesen und hietten die also hin- und auffgeben, das mo^an in alle jar die zwen meczen spe^enatsamen dovon dienen sol, und zaiget des auch i^er gru^entpucher ains und daruber einen briff mit unsers gena^edigen heren herczog Albrechtes, herczogen ze O^esterreich etc., au^efgedrükchten insigl, das dasselb pu^ech kraft sol haben und dawider chain recht sol gesprochen werden. Do ward gefragt, was nu^e recht we^ar. Do gevil mit frag und mit u^erta^eil, das man die egenanten zwen meczen spenatsamen solt von dem vorgenanten haus und garten daran mit aller seiner zugehorung ebichleichen dienen hincz dem Heyligenn Chreucz, als i^er pu^ech lau^ette^at, und solt auch dem selben gevallen rechten dem covent (!) gemain dacz dem Heyligen Chreucz mein urkund geben und solt mi^er der egenant pruder Peter an des covents stat darumb mein recht geben. Das hat er getan und des ze urkund, so gib ich dem covent dacz dem Heyligen Chreucz den bri^ef, versigilt mit meinem anhangunden insigil.||
Geben ze Wienn nach Kristi gepurd vi^erczehenhundert jar, darnach in dem sybenczehenden jar, des su^entags nach sannd Jorgen tag im panntayding.