Capitulum ecclesie Iauriensis omnibus Christi fidelibus, presentibus pariter ac futuris, presencium noticiam habituris salutem in omnium salvatore.||
Ad universorum tam presencium quam futurorum noticiam harum serie volumus pervenire, quod nos litteras statutorias¹ serenissimi principis et domini nostri, domini Sigismundi, Dei gracia Romanorum regis semper augusti ac Hungarie, Bohemie, Dalmacie, Croacie etc. regis, suprema cum obediencia recepimus in hec verba: ||
Sigismundus, Dei gracia Romanorum² rex semper augustus ac Hungarie, Bohemie, Dalmacie, Croacie etc. rex, fidelibus suis capitulo ecclesie Iauriensis salutem et graciam.||
Dicitur nobis in personis religiosi viri domini fratris Iohannis abbatis monasterii Sancte Crucis ordinis Cistersiensis (!) de Austria et conventus loci eiusdem, quod ipsi in dominiis cuiusdam possessionis Lendorff, alio nomine Leansuk sive Togonfelde vocate, in comitatu Mosoniensi existentis, ipsos et per consequens prefatum monasterium de Sancta Cruce de Austria empcionis et impignoracionis titulis concernentis, legitime vellent introire. Super quo fidelitati vestre firmiter precipiendo mandamus, quatenus vestrum mittatis hominem pro testimonio fide dignum, quo presente Seraphin de Mecher vel Iohannes filius eiusdem aut Nicolaus filius Iohannis sew alter Nicolaus de eadem vel Fridricus Waldphurger sin Petrus Groff de Katha sive Ladislaus de Eempne ceu Mychael neve Georgius de Gilye aliis absentibus homo noster ad faciem predicte possessionis Lendorff alias Leansuk sive Togonfelde vocate in dicto comitatu Mosoniensi existentis, vicinis et commetaneis eiusdem universis inibi legitime convocatis et presentibus, accedendo introducat prefatos fratrem Iohannem abbatem de Sancta Cruce et conventum loci eiusdem in dominium ipsum statuatque eandem eisdem premissis empcionis et impignoracionis titulis ipsis incumbentibus possidendam, si non fuerit contradictum. Contradictores vero si qui fuerint, evocet ipsos contra annotatos dominum fratrem Iohannem abbatem et conventum de Austria palatinalem in presenciam ad terminum competentem, racionem contradiccionis eorum reddituros, et post hec ipsarum statucionis et evocacionis seriem cum nominibus contradictorum et evocatorum, si qui fuerint, terminoque assignato dicto regni nostri palatino more solito rescribatur.||
Datum Bude feria quarta proxima post dominicam Ramispalmarum, anno Domini m^mo cccc^mo xx^mosecundo.||
Unde nos mandatis ipsius domini nostri regis in omnibus obedire cupientes, ut tenemur, una cum prefato Petro Groff de Katha homine suo nostrum hominem, videlicet honorabilem virum dominum Dominicum archidiaconum Mosoniensem, socium et concanonicum nostrum, ad premissa peragenda nostro pro testimonio fide dignum duximus transmittendum. Qui tandem ad nos exinde reversi nobis concorditer retulerunt, quod prefatus homo regius presente dicto nostro testimonio feria quarta proxima ante festum beatorum Philippi et Iacobi apostolorum proxime preteritum ad faciem predicte possessionis Lendorff alias Leansuk sive Togonfelde vocate in comitatu Mosoniensi existentis, vicinis et commetaneis eiusdem universis inibi legitime convocatis et presentibus, accessisset, introduxisset prefatum dominum Iohannem abbatem de Sancta Cruce et conventum loci eiusdem statuissetque eandem eisdem, premissis empcionis et impignoracionis titulis ipsis incumbentibus, possidendam, tenendam pariter et habendam, nemine inibi contradictore apparente, tribus eciam diebus continuis iuxta regni consuetudinem in facie eiusdem moram faciendo. ||
In cuius rei memoriam firmitatemque perpetuam presentes litteras nostras privilegiales pendentis et autentici sigilli nostri maioris munimine roboratas annotatis abbati et conventui de Sancta Cruce de Austria duximus concedendas. ||
Datum sedecimo die diey statucionis premisse, anno Domini supradicto, honorabilibus viris dominis Egidio preposito, Nicolao lectore, Thoma cantore, Mathia custode ceterisque dominis canonicis in dicta ecclesia nostra Deo iugiter famulantibus et devote.