Ich Wolfgang Pu^erkchl, bu^erger ze Medling, vergich fu^er mich und all mein erben und tu^en kund offenleich mit dem brieff allen lewten, gegnburtigen und ku^enftigen, das ich mit aller meiner erben guetem willen und mit wolbedachtem mu^et zu der zeit, do ich es mit recht wol getun mo^echt, und mit hannden des erbern manns Stephanns des Laystleins, zu^e den zeiten der erbirdigen geystleichen herren abt Johannsen und des convents gemainkleich datz dem Heiligen Chrew^ecz ambtman ze Entzesdorff under dem Liechtenstain bey Medling, recht und redleich verkauft hab mein weingarten in den Sne^ebellein gelegen, zenachst Echarts des Stecher weingarten, davon man alle jar je^erleich von dint den obgenanten erbirdigen geistleichen herren abt Johannsen und dem convent datz dem Heiligen Chrew^ecz drey^e und fu^enfczig Wienner phening an sand Michels tag ze rechtem gru^entdinst und nicht mer. Den selben obgenanten mein weingarten hab ich verkauft und geben mit allen nu^etzen und rechten, als ich in unversprochenleichen¹ in gruntsdinst (!) gewer inngehabt und herbracht hab und als er mit allter herko^emen ist, umb zwainczig phunnt Wienner phening, der ich gantz verricht und gewert pin an allen schaden, dem ersamen herren Jo^ergen dem Walchen, pharrer zu^e Sannd Gothart under dem Swabekk, und seinen erben, im fu^erbas ledikleich und vrey^eleich ze haben und allen seinen fru^emen damit ze schaffen mit verkauffen, mit verseczen, schaffen, machen und geben, wem er will, und alles das damit hanndln und tu^en, das im an dem pesten fu^eeget und wolgevellet, an aller seiner frew^endt und me^einkleichs irrung und hindernu^ess, und pin auch ich obgenanter Wolfgang Pu^erkchl mitsambt allen meinen erben unverschaidenleich des vorgenanten weingarten hern Jo^ergen, pharrer zu^e Sand Gothart, und seiner erben recht gewern und scherm ge^entzleich fu^er alle ansprach, als kaufs, pergs und des landes recht ist in O^esterreich. Gieng in aber hinfu^er daran icht ab oder stu^end in hinfu^er icht krieg oder ansprach daran auf, von wem das wa^er, mit recht, was sy des schaden nement, den selben schaden schol ich in allen ablegen und widerchern an allen irn schaden, und schu^ellen auch sy das haben datz mir und meinen erben unverschaidenleich und auf allem dem guet, das ich hab in dem land ze O^esterreich oder wo ich es hab, ich sey^e lebentig oder tod, und das der kauf hinfu^er also ste^et und unczebrochen beleib und wann ich die zeit selber nicht ay^egen insigel enhab, daru^eber so gib ich im und sein erben fu^er mich und mein erben den brieff, besigelt mit des obgenanten erbirdigen geistleichen herren abt Johannsen datz dem Heiligen Chrewcz anhangundem gru^entinsigell. Darczu^e hab ich vleissig gepeten den erbern Albrechten von Snay^ettach, mitburger ze Medling, das er der sach geczew^eg ist mit seinem insigell, im und sein erben an schaden.||
Geben ze Medling an montag vor dem heiligen auffart tag, nach Kristi gepu^erd vierczehenhundert und in dem vier und zwainczigstem jar.