Ich Kaspar der Po^arl vergich fur mich und all mein erben und¹ tun kund offenleich mit dem brieve allen den, die nu lebent und hernach kunftig sind, daz ich und² all mein erben und nachko^emen, oder wer unsern hof zu Aribaistal, zwischen Anthonien des Wildegger und des Arbaistaler hof gelegen, yecz und hernach besiczet, von demselben unserm hof mit allen seinn zugeho^erungen alle jar je^arleich an sand Michels tag zu rechtem pu^erkchrecht schuldig sein ze³ dienn und raichen sullen den erwirdigen geistleichen herren .. dem abbt und dem convent des kloster zum Heiligen Kre^aucz und i^ern nachko^emen in O^esterreich, oder wer uns mit dem brief monet, ain pfunt Wienner pfening ewiger re^anntt, die sy rechtt und redleich gekaufft habent von den erwirdigen geistleichen herren .. dem abbt und convent des closter zu Pe^alis in Ungern nach innhaldung der brief, die si von in und auch sunderleich nach lawt und innhaldung i^erenfrids des Po^erl meins vaters seligen brief, den si auch darumb habent. Te^aten wir des aber nicht, weliches jares wir dann dasselb pfunt gelts versiczen und nicht dienen, so habent die vorgeschriben .. der abbt und der convent zum Heiligen Kre^awcz volle macht und ganczen gewalt, die wir in oder wer disen brief mit i^erm guten willen innehat, in kraft des briefs geben, sich des egeschriben unsers hoffs zu Arbaistal mit seiner zugeho^erung ze underwinnden, als purkchrechts recht ist in dem lannde ze O^esterreich, und damit schaffen irn nucz und fru^omen an all fuerpot und clage als verr, daz si desselben versezzen pfunt gelts ge^anczleich verricht und gewertt werden, an unser und meincleichs irrung, und sullen wir und unser erben und nachko^emen, oder wer in kunftigen zeiten den oftgenanten unsern hof zu Arbaistail innehat oder besiczet, denselben unsern hof, oder welicherlay^e gu^eter es sein, wisen, ekcher, weinge^arttn oder ander zugeho^erung des hofs, wie die genant ist, die von alter her darczu geho^eret habent, nicht hingeben noch nichts verkauffen, verwechselen noch enpfro^embden in kainerlay weis an sunder urlawb und willen der vorgenanten herren .. des abbts und des convents zum Heiligen Kre^awcz. Darumb so gib ich egenanter Caspar der Po^erl fur mich und all unser erben und nachkomen in den brief zu aim warn urkund und geczewgnusse der sache, besigiltn mit meinem anhangunden insigil. Der sach sind geczewgen durch meiner fleissigen pet willen die erbern weisen Niclas Zingk, burger ze Wienn, und Jo^erg Kerss mit irn anhangunden insigiln, in und irn erben an schaden. ||
Geben ze Wienn an freitag nach dem auffartag, nach Kristi gepurde in dem virczehenhundertisten und in dem vir und czwainczigisten jare.