Capitulum ecclesie Iauriensis omnibus Christi fidelibus, presentibus pariter et futuris, presencium noticiam habituris salutem in omnium salvatore.||
Ad universorum tam presencium quam futurorum noticiam¹ harum serie volumus pervenire, quod nos litteras reambulatorias serenissimi principis et domini nostri domini Sigismundi Dei gracia Romanorum regis semper augusti ac Hungarie, Bohemie, Dalmacie, Croacie etc. regis maiore sigillo suo consignatas suprema cum obediencia recepimus in hec verba: (folgt der Text von Urk. 53)||
Unde nos mandatis prefati domini nostri regis in omnibus obedire cupientes, ut tenemur, una cum prefato Petro Groff de Gatha homine suo nostrum hominem, videlicet honorabilem virum dominum Dominicum archidiaconum Mosoniensem, socium et concanonicum nostrum, ad premissa peragenda nostro pro testimonio fide dignum duximus transmittendum. Qui tandem ad nos exinde reversi nobis concorditer retulerunt, quod prefatus homo regius presente dicto nostro testimonio feria secunda proxima post festum sanctorum Petri et Pauli apostolorum proxime preteritum ad faciem predicte possessionis Leandorff alio nomine Leansok sive Thogonfelde vocate in comitatu Mosoniensi existentis, vicinis et commetaneis eiusdem universis inibi legittime convocatis et eisdem ac religiosis et Deo devotis viris fratribus Stephano cellerario et Petro legittimis procuratoribus predictorum abbatis et conventus de Sancta Cruce, item nobilibus viris Vencezlao Bohemo castellano de Owar per egregium virum Paulum filium Vlrici dicti Volfarth de Vereskw in dicto castro Owar constitutum ac Iohanne dicto Wanger speciali familiari ipsius Pauli presentibus, accessisset ipsamque per suas veras et antiquas metas hoc ordine reambulasset. Quod primo incepisset super quodam monticulo Sathorkw vocato, in cuius monticuli vertice novam metam terream erexisset, ubi terra predicte possessionis Leansok contignaretur terre possessionis Varasbalugd alio nomine vel in vocabulo Teotonicali Ffincztagmargch nuncupate. Abhinc directe ad orientem procedendo pervenisset ad tres metas antiquas, ex quibus duas, unam scilicet lapideam possessioni Leansok, alteram possessioni condam Conrardi (!) distinguentes, renovasset. Inde ad plagam meridionalem procedendo in plano loco quandam metam antiquam cursualem reperisset, quam renovasset. Tandem in spacio non remoto transeundo ad tres metas antiquas in quodam monticulo positas attigisset, quas omnino renovasset, unam earundem a parte occidentis possessioni Leansok relinquendo. Abhinc per bonum spacium ad meridiem eundo penes quandam viam ad villam Zenthiwan conducentem a parte meridionali quinque metas antiquas in uno ordine cumulatas invenisset, quas renovasset, unam earum a parte occidentis possessioni Leansok, alteram a parte orientis dicte possessioni Zenthiwan reliquisset. Dimissaque predicta possessione Zenthiwan, tendendo ad meridiem, venisset ad quendam monticulum Gyoparus vocatum inter possessiones Geztenche et Leansok habitum, quem pro metali distinccione reliquisset. Deinde ad quandam viam graminosam per magnum spacium eundo, prope ipsam viam quatuor metas antiquas invenisset, quarum duas a parte aquilonari terram predicte possessionis Leansok distinguentes renovasset, alias duas antiquas a parte meridionali possessioni Seztenche relinquendo, ulterius ad plagam meridionalem in pratis seu fenilibus ac locis arundinosis per magnum spacium eundo pervenisset ad quendam meatum aque pratosum et arundinosum inter dictam possessionem Leansok et terram Ffarcasyzantho, in vocabulo vero Teotonicali Anthaw vocatam habitum, ubi sub quadam arbore salicis duas novas metas erexisset, quarum una distingueret predictam terram possessionis Leansok, altera terram predicte possessionis Zantho separaret. Quia autem ipsum meatum aque populi de dicta Zantho aut villicus de eadem singulis annis pro media libra denariorum arendative conservare consuevissent, voluisset procurator parcium prescriptarum, quod annis singulis de ipso meatu aque populi vel villicus de dicta Zantho sexaginta denarios ecclesie de predicta Leansok et totidem sexaginta denarios ecclesie de dicta Anthaw semper octavo die festi beati Georgii martiris sub pena dupli dare et solvere deberent et tenerentur. Dehinc ulterius ad partem occidentalem inter arundines procedendo in medio cuiusdam prati duas novas terreas, unam possessioni Leansok, alteram possessioni Anthaw separantes erexisset. Abhinc plagam ad eandem parumper procedendo inter ipsas arundines modo simili duas metas cumulasset. Dehinc versus eandem plagam similiter inter arundines procedendo duas metas dictis possessionibus separantes erexisset. Demum ad eandem plagam tendendo in bono spacio modo simili in locis arundinosis duas novas metas cumulasset. Abhinc vergendo inter meridiem et occidentem in bono spacio procedendo inter arundines duas novas metas, unam possessioni Leansok, alteram possessioni Anthaw separantes erexisset. Deinde versus eandem plagam procedendo, in spacio non remoto duas novas metas denuo erexisset. Abhinc declinando ad partem aquilonarem ad bonum spacium eundo inter arundines duas metas, unam a parte orientis in opposito ecclesie possessioni Leansok, alteram a parte meridionali possessioni Anthaw distinguentes erexisset. Abhinc in quodam prato per bonum spacium procedendo venisset ad quandam viam publicam de predicta villa Zenthiwan ad villam Anthaw ducentem. Ipsamque viam saliendo non longe ad ipsam viam a parte aquilonari duas novas metas, unam predicte possessioni Leansok, alteram annotate possessioni Anthaw cumulasset. Dehinc in parvo spacio versus eandem plagam aquilonarem procedendo quandam metam reperisset, quam possessioni Anthaw predicte renovasset. Iuxta quam a parte orientis aliam novam metam predicte possessioni Leansok erexisset. Abhinc in modico spacio plagam ad eandem eundo tres metas angulares, unam parte orientis prefate possessioni Leansok sive Leandorff, alteram a parte occidentis possessioni Zantho sive Anthaw et terciam a parte aquilonaris predicte possessioni Phinczthagmarchk distinguentes erexisset. Abhinc vergendo ad partem orientalem in bono spacio procedendo duas novas metas, unam a parte meridiey possessioni Leansok, alteram a parte aquilonari possessioni Phincztagmarch separantes accumulasset. Dehinc versus dictam plagam orientalem in spacio satis remoto procedendo modo simili duas novas metas iam dictis possessionibus distinguentes erexisset. Et sic tandem ad primam metam pervenisset, ubi prius ipsam possessionariam reambulacionem incepisset.||
Hiis peractis prenominatam possessionem Leandorff, alio nomine Leansok sive Thogonfelde vocatam, in comitatu Mosoniensi habitam modo quo superius ab aliorum iuribus possessionariis metaliter separatam et distinctam memoratis fratri Iohanni abbati ecclesie Sancte Crucis de Austria et conventui loci eiusdem sub inclusionibus predictarum metarum cum omnibus utilitatibus et pertinenciis suis universis premisso iure eis incumbenti perpetuo possidendi, tenendi pariter et habendi reliquisset et statuisset, nemine inibi contradictore apparente.||
In cuius rei memoriam firmitatemque perpetuam presentes litteras nostras privilegiales pendentis et autentici sigilli nostri maioris munimine roboratas dictis domino fratri Iohanni abbati et conventui monasterii Sancte Crucis de Austria duximus concedendas.||
Datum sedecimo die diey possessionarie reambulacionis, metarum ereccionis et statucionis premissarum, anno Domini supradicto, honorabilibus viris dominis Egidio preposito, Nicolao lectore, Thoma cantore, Mathia custode ceterisque dominis canonicis in dicta ecclesia nostra Deo iugiter famulantibus et devote.