Ich Vlreich Voss, burger czu Regens(purg), bechenn offenleich mit dem brief von der czuspruch und voderung wegen, als ich gehabt han hincz meinem swager Chunrad dem Schrimpfen von eines silbrein napfs wegen, des mich ein viertail an gepu^ert und czugehört hat von meiner geswistrigeit und meins vater seligen geschäftz und erbschaft wegen. Darumb bin ich mit im fre^euntleich verricht und verteidingt auf ein gancz end, und was mir fur meinen tail des napfs geschaiden und gesprochen ist worden, des hat er mich genczleich gericht und beczalt. Auch bin ich meins viertails an der mu^el und an den haw^esern, als daz mein vater seliger gehabt und mir und meinen geswistrigeiden gelassen hat, genczleich gericht und gerot (!), allez czu rechter weil und czeit an all mein schaden. Des allez sag ich meinen obgenanten swager und meinew^e geswistrigeit und auch meins vater seligen gescha^eftherren genczleichen quitt, ledig und loz mit dem brief, als verer, das ich von dez obgenanten gucz wegen hincz in, hincz iren erben noch hincz irer hab und gut chain ansprach noch voderung nicht mer haben noch gewinnen sol noch enmag, weder ich noch mein erben noch anders niemand von meinen wegen in chainer weiz, ez wa^er denn, ob mir und meinen erben von todes, von erbschaft oder von geschäftz wegen ichtz czustu^end und angepu^eret, daran sol mir der brief unschedleich sein.||
Und des czu urchund gib ich in den brief, versigelten mit dez ersamen weisen hern Peter des Mäller, schultheiss czu Regens(purg), insigel, das er nach meiner vleissigen pet an den brief gehengt hat, der sach czu einer geczewkchnüss, im und seinen erben unenkolten und on schaden, darunder ich mich verpind fur mich und mein erben, sta^et zu halten, waz an dem brief verschriben ist. Der sach sind teidinger gewesen Hanns Mullner auf der Rontingerinn mu^el, Fridr(eich) Voss mein vetter, Andre Smid an dez herczogen hof, Peter Mu^ellner im Nidern Wird und Hanns Sommer, gesworner ambtman.||
Das ist geschehen nach Christi gepürt vierczehenhundert jar und darnach in dem sechs und czwainczigistem jar, dez nachsten eritags nach dem suntag Iudica in der vasten.