Ego, Andreas plebanus in Gors, illustris principis et domini domini Alberti ducis Austrie marchionisque Moravie etc. cancellarius, notum facio tenore presencium universis, ad quorum noticiam presentes contigerit pervenire, quemadmodum reverendus pater dominus Iohannes abbas monasterii Sancte Crucis ordinis Cistersiensis Pataviensis diocesis suo et conventus sui nominibus ex una et honorabilis vir dominus Iacobus de Sancto Vito, rector parochialis ecclesie in Haugstorf, presbiter dicte Pataviensis diocesis, partibus ex altera de et super nonnullis iniuriis seu accionibus iniuriarum inter ipsas partes subortis et quas quevis dictarum parcium quacumque occasione seu ex quacumque causa alteri parti hactenus movit iudicialiter aut extraiudicialiter, eciam si ad sentencias unam aut plures diffinitas seu interlocutorias sit processum, necnon super arbitrum, arbitratorem et amicabilem compositorem de certa ipsarum sciencia sano consilio maturaque deliberacione prehabitis de alto et basso compromiserunt ac quevis ipsarum parcium efficaciter compromisit, petentes instancius et rogantes, ut super omnibus accionibus, differenciis seu dissensionibus prelibatis inter ipsas partes quomodolibet motis seu exortis plenam et omnimodam diffiniendi habeam facultatem, promittentes utrimque bona fide omnia et singula super dictis differenciis seu discordiis per me, sicut prefertur, semel aut pluries diffinita aut diffinienda laudare, emologare ac ad plenum servare et non contravenire verbo vel facto, publice aut occulte, directe vel indirecte, quovis quesito ingenio vel colore, renuncciaveruntque propterea hinc inde ac quelibet ipsarum parcium renuncciavit expresse omnibus accionibus, iuri, liti et cause omnibusque iuris et facti excepcionibus seu tutelis, quibus contra huiusmodi meum arbitramentum seu diffinicionem verbo aut facto, publice aut occulte, per se vel per alios iudicialiter aut extraiudicialiter possent venire. Quapropter dictarum parcium querelis et responsionibus auditis litterisque sentencie ac aliis munimentis et iuribus per ipsas partes hinc inde exhibitis et in medium productis diligenter visis, recensitis et auscultatis super omnibus et singulis memoratis differenciis et dissensionibus inter partes prefatas motis quomodolibet aut subortis pronunciavi et pronunccio in hunc qui sequitur modum, primo quod omnes et singule acciones, lites, querele, dissensiones et differencie inter ipsas partes quacumque occasione seu causa hinc inde mote et suborte penitus et omnino sopite esse debent et concordate nullaque dictarum parcium alteram super eisdem aut ipsarum occasione per se aut per alium, directe aut indirecte, iudicialiter aut extraiudicialiter in antea impetere, inquietare seu turbare debet quovis modo, quando potius quelibet parcium predictarum alteram prosequi debet amicicia et favore, fraude et dolo quibuslibet penitus procul motis. Item pronuncio, arbitror et diffinio, quod prefati domini .. abbas et conventus dicto domino Iacobo occasione dictarum litium, dissensionum seu differenciarum in parata et numerata pecunia solvere et dare debent decem libras denariorum Wiennensium usualis monete. Si qua vero parcium predictarum huiusmodi laudum diffinicionem seu arbitramentum in toto aut in parte violare presumpserit, a iure sui, si quid habere dinoscitur, cadat omnino partique servanti centum florenos in auro iusti et legalis ponderis et episcopo Pataviensi pro tempore existenti totidem michique quinquaginta florenos eiusdem monete absque omni remissione solvere, pagare et dare teneatur effective. ||
Actum et pronuncciatum Wienne per me Andream arbitrum seu arbitratorem supra nominatum, die Iovis octava Aprilis, anno Domini millemo quadrinmo vicesimo octavo.||
Harum testimonio litterarum meo dictarumque parcium sigillis appendentibus munitarum.||
||
(Von anderer Hand:) Nos frater Iohannes abbas Sancte Crucis in Austria supradictum arbitramentum de nostra nostrique conventus certa sciencia et voluntate factum et promulgatum fore profitemur ipsumque laudamus, emologamus et approbamus expresse. In cuius rei testimonium nos propria manu hoc scripsimus sigillique nostri munimine presentes roboramus.||
||
(Von dritter Hand:) Et ego Iacobus de Sancto Vito, plebanus in Haugstorf, supradictum arbitramentum de mea certa sciencia et voluntate factum et promulgatum fore profiteor ipsumque laudo, emologo et aprobo expresse. In cuius rei testimonium ego ipse manu hic scripsi sigillique mei munimine presentes roboravi ipsasque pecunias percepi.