Nos Leonardus permissione divina abbas, fratres Iohannes prior, Kaspar cellerarius totusque conventus monasterii Mellicensis ordinis sancti Benedicti Pataviensis diocesis ad Romanam ecclesiam nullo medio pertinentis fatemur publice et recognoscimus per presentes, quod nuper videlicet die date presencium hora nonarum vel quasi in loco capitulari dicti monasterii ad sonum nole propterea specialiter congregati, matura deliberacione prehabita, concorditer, nemine discrepante, sponte et libere compromisimus et compromittimus per presentes in venerabiles patres et dominos Georgium prepositum monasterii Nu^enburgensis ordinis sancti Augustini canonicorum regularium, Leonardum priorem monasterii Maurbacensis ordinis Cartusiensis, Casparem de Meisselstain et Conradum de Hallstat decretorum doctores tanquam in voluntarios arbitros, arbitratores, amicabiles compositores et amicos communes per nos ex una et venerabilem in Christo patrem ac religiosos fratres et dominos .. abbatem et conventum monasterii Sancte Crucis ordinis Cisterciensis Pataviensis diocesis parte ex altera concorditer et utrimque electos, nominatos et assumptos, dantes et concedentes eisdem arbitris plenam, integram et omniomodam (!) potestatem arbitrandi, laudandi, diffiniendi, terminandi, pronunciandi ac penas quascunque parti non servanti, pronunciacionem ipsorum imponendi super omnibus et singulis questionibus et litibus, controversiis, discordiis, dissensionibus et iniuriis, tam realibus quam eciam verbalibus, inter nos et prefatos dominos .. abbatem et conventum Sancte Crucis hucusque occasione decimarum, vinorum et bladorum ac aliarum quarumcunque in parrociis Dre^askirchen et Medling cum ipsarum filiabus et alibi ubicunque et quocunque modo super quibuscunque rebus sive quacunque occasione seu causa factis, habitis, illatis et exortis. Compromittimus quoque per presentes nos gratum, ratum atque firmum inconcusse et in perpetuum habituros, quicquid per prefatos patres et dominos arbitros, arbitratores, amicabiles compositores ac amicos communes dictatum, arbitratum, diffinitum, terminatum, laudatum atque pronunciatum fuerit et sub pena per eos imponenda.||
In quorum omnium et singulorum testimonium efficax atque fidem premissorum presentes litteras nostrorum sigillorum appensione duximus roborandas.||
Acta sunt hec in nostro monasterio Mellicensi prefato, anno domini millesimo quadrinmo vicesimo octavo, die nona mensis Iulii, hora qua supra, presentibus ibidem venerabili in Christo patre domino Nicolao priore domus Troni Marie alias in Ge^amnico ordinis Carthusiensis, honorabili viro domino Cristanno plebano in Oberndorf presbitero, Petro Wolfram armigero et Cristanno de Karlsteten clerico Pataviensis diocesis testibus per nos ad premissa vocatis pariter et rogatis.