Ich V^elreich Pherse^e, diezeit hawssleich gesessen zu Pidermanstarff, vergich fu^er mich und all mein erben und nachkomen und tuen kund offenleich mit dem brieff allen lewten, gegenwu^ertigen und kuenfftigen, das ich mit wolbedachtem muet, zu der zeit, do ich es wol getuen mocht, recht und redleich aufgegeben hab und gib wissentleichen ayn halbs feldlechen ekcher, gelegen zu Pidermanstarff ze nachst Hans Lappen viertail nyderhalben, und hab darzue gegeben syben tagwerich wissmad, ayn tagwerich gelegen pey der Medling an Aychawer pe^am, die anderen sechs tagwerich gelegen pey der Staynpruk in Lachssendarffer piet, ayns zenachst pey der Staynpruk enhalb der Swecheit und die fumff tagwerich genant die Do^ernwis zenachst des Starchen Haynreichen und auch enhalb der Swecheit, und das vargenant halb feldlechen und die siben tagwerich wissmad hab ich ausgegeben zu rechtem u^eberlend und gib auch wissentleichen mit dem brieff dem ersamen Steffann dem Lechner und Kristlein seyner hawssfrawn und i^err payder erben, auch diezeit gesessen zu Pidermanstarff, in solicher beschaidenhait, das sew mi^er und meinn erben und all meinen nachkomen ierleich dienen schullen in meynen hoff zu Pidermanstarff zehen meczen, fu^emf karen und fu^emff habern, auf sand Giligen tag und vierdhalben schilling phening auf sand Michels tag und vierdhalben schilling phening auf sand Go^ergen tag zu rechtem gruntdienst und nicht mer. Es schullen auch der benant Steffan Lechner und Kristel sein hawsfraw und i^er paider erben mit dem benanten halben feldlechen und mit den benanten syben tagwerich wissmaden in all i^erer gelegenhait und als das alles von alter herkomen ist hinfuer ledichleich und freyleich all i^er fruemen damit schaffen mit verseczen, mit verkauffen, geben, schaffen, machen, wem sy wellen, als in das allerpest fueget und wol gefellet, mit dem benanten di^enst, als oben geschriben ist, und sein auch darum ich obgenanter V^elreich Pherse^e mit all meinen erben und nachkomen i^er recht gwer und scherm fu^er all ansprach, als so^eleichs u^eberlendigs erbsrecht ist und des landes ze o^estereich.||
Mit u^erkund des briefs, besigelt mit meinen obgenant V^elreich Pherse^e anhangunden insigel, und zu zeugnu^es hab ich gepeten den edeln Niclosen den Tewfel von Wynssendarff, das er seyn sigel auch an disen brief gehangen hat, im und seinen erben an schaden.||
Der brieff ist geben nach Kristi gepu^erd vi^erzehenhundert iar, und darnach in dem dreyskisten iar, sand Peter und sand Pawls obent der heyligen zweliffpoten.